قىتاي كومپانيالارى ەلىمىزدىڭ 3 وڭىرىندە استىق پەن جۇگەرى وڭدەيتىن زاۋىتتار سالادى

استانا. KAZINFORM - قىتاي كومپانيالارى ەلىمىزدىڭ ءۇش وڭىرىندە استىق پەن جۇگەرىنى تەرەڭ وڭدەيتىن زاۋىتتار سالادى. بۇل جايىندا ءماجىلىس دەپۋتاتتارىنىڭ ساۋالىنا پرەمەر-مينيستر ولجاس بەكتەنوۆتىڭ جاۋابىندا ايتىلعان.

- بۇگىنگى تاڭدا ءۇش ماڭىزدى جوبانى ىسكە اسىرۋ باعىتىندا جۇمىس جۇرگىزىلىپ جاتىر. جوبالار استىق پەن جۇگەرىنى تەرەڭ وڭدەيتىن زاۋىتتار سالۋدى كوزدەيدى. بۇل باستامالار ەلىمىزدىڭ اگروونەركاسىپتىك كەشەنىن جاڭعىرتۋعا، جاڭا جۇمىس ورىندارىن اشۋعا جانە ەكسپورتتىق الەۋەتتى ارتتىرۋعا كومەكتەسەدى. الماتى وبلىسىندا استىقتى تەرەڭ وڭدەۋ زاۋىتىن سالۋ جوسپارلانىپ وتىر، - دەدى ۇكىمەت باسشىسى.

ونىڭ دەرەگىنشە، «Shanghai Side Cheng Biotechnology» جانە «CITIC» كونسورتسيۋمى سالاتىن زاۋىتتىڭ ءوندىرىس قۋاتى 1-كەزەڭدە - جىلىنا 300 مىڭ توننا، 2-كەزەڭدە - جىلىنا 600 مىڭ توننا، 3-كەزەڭدە جىلىنا 1 ميلليون توننا بولماق. جوبانىڭ قۇنى 1-كەزەڭدە - 170 ميلليون ا ق ش دوللارى، 2-كەزەڭدە - 350-450 ميلليون ا ق ش دوللارى، 3-كەزەڭدە - 450-550 ميلليون ا ق ش دوللارى. جوبانىڭ جالپى قۇنى 1 ميلليارد ا ق ش دوللارىنان اسادى. ءوندىرىستىڭ جالپى كولەمى شامامەن 2 ميلليون تونناعا دەيىن جەتەدى. بولاشاقتا ونىڭ قۋاتىن ارتتىرۋ جوسپارلانعان.

- قىتايلىق «Shijixianghe agribusiness Group» كومپانياسى اقمولا وبلىسىندا جىلىنا 1 ميلليون توننا بيداي وڭدەيتىن زاۋىت سالۋدى جوسپارلاۋدا. جوبانىڭ قۇنى 1,6-1,8 ميلليارد ا ق ش دوللارى شاماسىندا. قىتايلىق «Fufeng Group» كومپانياسى جامبىل وبلىسىندا جىلىنا 500 مىڭ توننا جۇگەرى وڭدەيتىن زاۋىت سالۋدى كوزدەپ وتىر. ونەركاسىپتىك پارك قۇرامىندا كراحمال مەن قانت زاۋىتى، امينقىشقىلدارىن اشىتۋ زاۋىتى، كومىرمەن جۇمىس ىستەيتىن جىلۋ ەلەكتر ستانتسياسى جانە سارقىندى سۋلاردى تازارتۋ ستانسياسى بولادى. جوبا قۇنى 350 ميلليون ا ق ش دوللارى دەپ باعالانادى. بۇل جوبانىڭ الەۋەتتى نارىقتارى - ەۋروپالىق وداق، سولتۇستىك امەريكا جانە تاياۋ شىعىس ەلدەرى، - دەدى ولجاس بەكتەنوۆ.

بۇعان دەيىن ەلىمىز جاڭا نارىقتارعا 1,5 ميلليون تونناعا دەيىن استىق ەكسپورتتاۋدى جوسپارلاپ وتىرعانىن جازعان ەدىك.

اۆتور

مارلان جيەمباي