قىتاي كولىگىن ساتىپ العان دۇرىس پا؟

قىتاي كولىگىن ساتىپ العان دۇرىس پا؟
فوتو: news.myseldon.com

نارىقتى قىتاي كولىگى جايلادى. جاڭا كولىككە سۇرانىس ارتپاسا، كەمىمەيدى. قىمباتىنا قارجى جەتپەيدى. سوندىقتان ەل قىتايدا قۇراستىرىلعان كولىكتى جاپپاي الىپ جاتىر. 

جاڭا كولىكتىڭ باعاسى قولجەتىمدى، ءجۇرىسى جاقسى، جۇرگىزۋشىگە بارلىق جاعداي جاسالعان دەيدى.

قالا تۇرعىنى ەرقانات سارسەنباي: «قازىر الەۋمەتتىك جەلىدە، ەل اراسىندا قىتاي كولىكتەرى وتە ساپاسىز دەگەنگە سايادى. مەن وعان كەلىسپەيمىن. قازىر اۋىر تەحنيكا دەيمىز عوي، قۇرىلىستا جۇرگەن تراكتور بولسىن، كراندار بولسىن قىتاي تەحنيكاسىن ءبارى ماقتايدى. سوندىقتان مەندە قىتاي كولىگىن الاردا قورقىنىش بولمادى»، - دەيدى.

قىتاي كولىكتەرى بۇكىل الەمدى جاۋلاپ الدى. وتكەن جىلى 43 ميلليونعا جۋىق كوممەرتسيالىق جانە جەڭىل اۆتوموبيل ساتىلعان. ونىڭ 4 تەن ءبىرى قىتايلىقتارعا تيەسىلى. وسىلايشا، ولار نەمىس، جاپون، امەريكانىڭ كولىكتەرىن ساتىلىم جاعىنان باسىپ وزدى. ماماندار ءدال وسى قارقىن ساقتالسا، بىرەر جىلدا الەمنىڭ الپاۋىتتارى قىتاي كولىكتەرىنىڭ شاڭىنا دا ىلەسە الماۋى مۇمكىن ەكەنىن ايتادى. ال حالىقتىڭ ويى بۇل كولىكتەرگە كەلگەندە ەكىگە ءبولىندى.

الەۋمەتتىك جەلىدە قىتاي ەلى كولىگىنىڭ ساپاسىنا سىن ايتقان وسىنداي ۆيدەولار از ەمەس. ونى قىتايلىق ساراپشىلار دا قولدايدى. كورشى ەلدىڭ اقپارات اگەنتتىكتەرى ماڭداي تەرمەن جيناعان قارجىنى كولىككە جۇمساۋعا اسىقپاڭىز دەيدى. سەبەبى وندىرۋشىلەر ساپاعا ءمان بەرىپ جاتقان جوق دەپ جازعان. ونىڭ ۇستىنە، كولىكتەر كوز ىلەسپەس جىلدامدىقپەن جاڭارۋدا. ال ولاردىڭ قوسالقى بولشەكتەرى ءبىر-بىرىنە كەلمەيدى.

Toutiao.com سايتىندا جاريالانعان مالىمەتتە: «سىرتى مەن سالونى ادەمى، ۇلكەن ەكرانى بار، جىلتىراعان كولىك كورسەڭىز جابىسا كەتپەڭىز. شىن مانىندە، بۇلاردىڭ تۇككە كەرەگى جوق. باستىسى، كولىكتىڭ ساپالى بولعانى. شىعارىپ جاتقان كولىكتىڭ كوبى شيكى»، - دەپ جازىلعان.

بىلتىر ەلىمىزدە ساتىلعان جاڭا تەمىر تۇلپاردىڭ 15 پايىزى قىتايدان اكەلىنگەن.

ساراپشى وڭعار الپىسباي: «ولاردىڭ كولىكتەرىندە كوپ نارسە بار. كومەكشىلەر بار. وتە كوپتەگەن جاڭا تەحنولوگيالار پايدالانىلعان. ولار قازىر وتە جاقسى جۇمىس ىستەپ تۇر. دەگەنمەن ۋاقىت وتە كەلە قوسىمشا قۇرىلعى كوپ بولعاندىقتان، بولاشاقتا بۇزىلاتىن زات تا كوپ دەگەن ءسوز. ياعني، كولىكتىڭ باعاسى سول قالىپتا قالۋى وتە قيىن»، - دەگەن پىكىردە.

قازىر ەۋروپالىقتار قىتاي كاسىپكەرلەرىنە شاعىمدانۋدا. قىتاي بيلىگى كاسىپكەرلەرگە سۋبسيديا بەرۋدە. سونىڭ ارقاسىندا ەۋروپادا قىتاي كولىگى ءوز باعاسىنان دا تومەن ساتىلۋدا. وسىلايشا، اۆتووندىرۋشىلەر اراسىندا ادىلەتسىز باسەكەلەستىك ورنادى. قىتايلىقتار وسى تاسىلمەن بۇكىل الەمنىڭ اۆتونارىعىن جاۋلاپ الماق. ساراپشىلاردىڭ پىكىرىنشە، جاڭا تەمىر تۇلپار قۇنى بولاشاقتا تاعى دا ارزانداۋى مۇمكىن.

 

دەرەككوز 

AstanaTV

سوڭعى جاڭالىقتار