قىتاي ەكسپورتى مەن قازاقستان يمپورتى اراسىنداعى الشاقتىق 6 ايدا 3,3 ميلليارد دوللار بولدى
2023-جىلدىڭ 6 ايىندا قىتاي ەكسپورتى مەن قازاقستان يمپورتى اراسىنداعى الشاقتىق 3,3 ميلليارد دوللارعا جەتتى، دەپ حابارلايدى قازاقپارات ءتىلشىسى.

«قىتاي حالىق رەسپۋبليكاسىنىڭ ەكسپورتى مەن قازاقستان رەسپۋبليكاسىنىڭ يمپورتى اراسىنداعى الشاقتىق 2023-جىلدىڭ 1-جارتىجىلدىعىنىڭ اينالى ستاتيستيكاسى بويىنشا 31,8 پايىز نەمەسە 3,3 ميلليارد دوللار. قىتاي حالىق رەسپۋبليكاسىمەن اينالى ستاتيستيكاداعى الشاقتىقتى ازايتۋ ماقساتىندا شەكارا ماڭىنداعى وتكىزۋ پۋنكتتەرىندە باقىلاۋ كۇشەيتىلدى. قۇن تاۋەكەل ينديكاتورلارى قايتا قارالدى»، - دەپ اتاپ وتەدى مەملەكەتتىك كىرىستەر كوميتەتى اگەنتتىكتىڭ رەسمي ساۋالىنا بەرگەن جاۋابىندا.
ۆەدومستۆو مالىمەتىنشە، «تاۋەكەلدەردى باسقارۋ جۇيەسى» اقپاراتتىق جۇيەسىندە سۋبەكتىگە باعىتتالعان كوزقاراس جانە دەرەكتەردى يننتەلەكتۋالدى وڭدەۋ ەنگىزىلىپ جاتىر.
«2022-جىلدىڭ قورىتىندىسى بويىنشا «قازاقستان يمپورتى - قىتاي ەكسپورتى» باعىتى بويىنشا قازاقستان مەن قىتايدىڭ ستاتيستيكالىق دەرەكتەرى اراسىنداعى الشاقتىق 9,2 پايىزدىق كورسەتكىشكە (2021-جىلى 41,1 پايىزدان 2022-جىلى 31,9 پايىزعا دەيىن) قىسقاردى»، - دەپ اتاپ وتەدى كوميتەتتەن.