قىتاي جەر سىلكىنىسىنىڭ سالدارىن جويۋعا سپۋتنيكتەر مەن درونداردى جۇمىلدىردى

قىتايدىڭ اەروعارىشتىق عىلىم جانە تەحنولوگيالار كورپوراتسياسى (CASC) جۇما كۇنى تابيعي اپاتتان كەيىن شۇعىل بايلانىس ورناتۋ، اۋماقتى ءتۇسىرۋ جانە زارداپ شەككەن ءوڭىردى باقىلاۋ ءۇشىن قاجەتتى سپۋتنيكتىك رەسۋرستاردى جەدەل ۇيلەستىرىپ، ىسكە قوسقانىن مالىمدەدى.

CASC دەرەگىنشە، قىتايدىڭ توتەنشە جاعدايلاردى باسقارۋ مينيسترلىگىنە، سيتسزان اۆتونوميالىق اۋدانىنىڭ توتەنشە جاعدايلار جونىندەگى باسقارماسىنا جانە ەلدىڭ نەگىزگى بايلانىس وپەراتورلارىنا سپۋتنيكتىك ينتەرنەت ارقىلى جۇمىس ىستەيتىن جوعارى وتكىزۋ قابىلەتى بار بىرنەشە شۇعىل بايلانىس جەلىسى ۇسىنىلدى. قالعان بايلانىس تەرمينالدارى اپات ايماعىنا كەزەڭ- كەزەڭىمەن جەتكىزىلىپ جاتىر.

جەر سىلكىنىسىنە بايلانىستى سپۋتنيكتىك ءتۇسىرىلىم جاساۋ تۋرالى وتىنىشتەرگە جاۋاپ رەتىندە CASC بىردەن Gaofen-4 جانە باسقا دا سپۋتنيكتەردى ىسكە قوسىپ، ءزىلزالا بولعان اۋماقتى باقىلاۋعا الدى. بەيجىڭ ۋاقىتى بويىنشا جۇما كۇنى تاڭعى ساعات 07:00 گە دەيىن اپاتقا دەيىن تۇسىرىلگەن ءتورت جانە ودان كەيىن تۇسىرىلگەن ءۇش سۋرەت جەدەل ازىرلەنىپ، قۇتقارۋ جۇمىستارى مەن اپات سالدارىن جويۋعا بەرىلدى.

قىتايدىڭ اۆياتسيا ونەركاسىبى كورپوراتسياسىنىڭ (AVIC) حابارلاۋىنشا، Wing Loong ۇشقىشسىز ۇشۋ اپپاراتى جۇما كۇنى تاڭەرتەڭ شيگادزە قالاسىنداعى اۋەجايدان جەر سىلكىنىسى بولعان اۋماققا اتتاندى. ول اپات اۋقىمىن باعالاۋ، جاعدايدى باقىلاۋ جانە بايلانىسپەن قامتاماسىز ەتۋ مىندەتتەرىن ورىنداۋعا جىبەرىلدى.

سونداي-اق 23-قازانعا قاراعان ءتۇنى قىتاي حالىق- ازاتتىق ارمياسىنىڭ اسكەري-اۋە كۇشتەرى اپات اۋماعىن اۋەدەن باعالاۋ ءۇشىن تاعى ءبىر ۇشقىشسىز اپپاراتتى ىسكە قوستى.

جەرگىلىكتى بيلىكتىڭ جۇما كۇنگى مالىمەتىنشە، بەيسەنبى كۇنى بەيجىڭ ۋاقىتىمەن ساعات 22:33 تە شيزاڭ اۆتونوميالىق اۋدانىنىڭ ناگچۋ قالاسىنا قاراستى باچەن ۋەزىندە بولعان جەر سىلكىنىسىنەن 16 ادام قازا تاۋىپ، تاعى 76 ادام جاراقات الدى.

ايتا كەتەيىك، بۇعان دەيىن 22-قازان كۇنى قىتايدا 7 بالدىق جەر سىلكىنىسى بولعان ەدى.

ال كەيىن تيبەتتەگى جەر سىلكىنىسىنەن زارداپ شەككەندەر سانى 65 كە جەتتى.