قىتاي جەر سىلكىنىسىنەن زارداپ شەككەندەرگە 80 ميلليون يۋان ءبولدى
استانا. KAZINFORM - قىتاي شيزاڭ اۆتونوميالىق ولكەسىندا بولعان 7,0 بالدىق جەر سىلكىنىسىنەن زارداپ شەككەندەرگە كومەك كورسەتىپ، ينفراقۇرىلىمدى قالپىنا كەلتىرۋ ءۇشىن 80 ميلليون يۋان (5,4 ميلليارد تەڭگە) ءبولدى. ءزىلزالادان 16 ادام قازا تاۋىپ، تاعى 76 ادام جاراقات العان، دەپ حابارلايدى شينحۋا.
جەر سىلكىنىسى بەيسەنبى كۇنى ساعات 22:33 تە ناگچۋ قالاسىنىڭ باچەن ۋەزىندە بولىپ، 16 ادامنىڭ ءومىرىن قيدى. سونداي-اق 76 ادام جاراقات الدى.
قىتايدىڭ قارجى مينيسترلىگى مەن توتەنشە جاعدايلاردى باسقارۋ مينيسترلىگى قۇتقارۋ شارالارى مەن زارداپ شەككەن تۇرعىندارعا كومەك كورسەتۋگە 50 ميلليون يۋان ءبولدى. ال دامۋ جانە رەفورمالار جونىندەگى مەملەكەتتىك كوميتەت بۇلىنگەن ينفراقۇرىلىم مەن قوعامدىق نىسانداردى قالپىنا كەلتىرۋگە ورتالىق بيۋدجەتتەن قوسىمشا 30 ميلليون يۋان قاراستىردى.
بۇعان قوسا قىتاي بيلىگى جەر سىلكىنىسىنە بايلانىستى مەملەكەتتىك دەڭگەيدەگى توتەنشە جاعدايعا دەن قويۋ رەجيمىن 4-دەڭگەيدەن 3-دەڭگەيگە كوتەرىپ، تابيعي اپاتتارعا دەن قويۋدىڭ 4-دەڭگەيلى تەتىگىن ىسكە قوستى.
قىتايدىڭ ءورت ءسوندىرۋ قۇتقارۋ قىزمەتى ىزدەۋ قۇتقارۋ شارالارىن جۇرگىزۋ ءۇشىن اپات بولعان ايماققا 350 قۇتقارۋشى مەن 83 ارنايى تەحنيكا جىبەردى. سونداي-اق توتەنشە جاعدايلاردى باسقارۋ مينيسترلىگى شيزاڭ اۆتونوميالىق ولكەسىنىڭ توتەنشە جاعدايلار جونىندەگى دەپارتامەنتىنە اپات ايماعىنداعى احۋالدى بايقاۋ ءۇشىن «يىڭلۋڭ» (Wing Loong) بارلاۋ درونىن جىبەرۋدى تاپسىردى.
جۇما كۇنى تاڭعى ساعات 6:30 داعى جاعداي بويىنشا وسى قۇتقارۋشىلاردىڭ 120 سى مەن 27 تەحنيكا اپات ايماعىنا جەتتى، ال شيزاڭ ايماقتىق ءورت ءسوندىرۋ- قۇتقارۋ جاساعىنىڭ 230 قۇتقارۋشىسى مەن 56 تەحنيكاسى قوسىمشا كۇش رەتىندە ناگچۋ اۋماعىندا بولدى.
تاڭ اتا اپات ايماعىنا ورتالىق جانە وڭىرلىك بيلىك ورگاندارى، سونداي-اق قالا مەن اۋدان اكىمدىكتەرى بولگەن گۋمانيتارلىق كومەك جەتكىزىلدى. ال تاڭعى ساعات 04:30 عا دەيىن 1000 جينالمالى ءۇي مەن 2821 توسەك، 3239 شاتىر، 4280 كورپە جانە باسقا دا كۇندەلىكتى قاجەتتى زاتتار جەتكىزىلگەن.
بۇعان دەيىن قىتاي جەر سىلكىنىسىنىڭ سالدارىن جويۋعا سپۋتنيكتەر مەن درونداردى جۇمىلدىرعانىن حابارلاعان ەدىك.
