قىتاي جەر سىلكىنىسىنە دەن قويۋدىڭ ەڭ جوعارى دەڭگەيىن ەنگىزدى
استانا. KAZINFORM - بۇل تۋرالى قىتايداعى شيزاڭ اۆتونوميالىق اۋدانىنىڭ ايماقتىق شتابىنان ءمالىم ەتتى، دەپ حابارلايدى Kazinform مەنشىكتى ءتىلشىسى.
قىتايدىڭ وڭتۇستىك- باتىسىنداعى اۆتونوميالىق اۋدانىنداعى ريگازە قالاسىندا بولعان جەر سىلكىنىسىنەن كەيىن توتەنشە ارەكەت ەتۋ دەڭگەيى ءبىرىنشى دەڭگەيگە كوتەرىلدى.
6,8 بالدىق جەر سىلكىنىسىنەن كەيىن ق ح ر سۋ رەسۋرستارى مينيسترلىگى (س ر م) زارداپ شەككەن اۋداندارداعى سۋ رەسۋرستارى نىساندارىن مۇقيات زەرتتەۋ جانە قاۋىپ-قاتەرلەردى باعالاۋ، سونداي-اق اپاتتىڭ قايتالانۋ ىقتيمالدىعىن انىقتاۋ ءۇشىن جۇمىس توپتارىن جىبەردى.
Xinhua اگەنتتىگىنىڭ حابارلاۋىنشا، ۆەدومستۆو ءتيىستى قۇرىلىمدارعا قاۋىپتى ايماقتاردىڭ تۇرعىندارىنا الدىن الا ەسكەرتۋ جاساپ، ولاردىڭ قاۋىپسىز جەرلەرگە كوشۋىنە قولعابىس ەتۋدى تاپسىرعان. س ر م حابارلاۋىنشا، قازىرگى ۋاقىتتا ۇلكەن ءقاۋىپ تۋرالى حابارلاما تۇسكەن جوق.
ق ح ر قوعامدىق قاۋىپسىزدىك مينيسترلىگى (ق ق م) قۇتقارۋ جۇمىستارىن جۇرگىزۋ، كولىك قوزعالىسىن باقىلاۋ جانە قوعامدىق ءتارتىپتى ساقتاۋ ءۇشىن جەرگىلىكتى پوليتسيا كۇشتەرىن جۇمىلدىردى.
سەيسەنبىدە ق ح ر مەملەكەتتىك كەڭەسىنىڭ پرەمەرى لي شياڭ اپاتتىڭ اۋقىمى، زارداپ شەككەندەر مەن قازا تاپقاندار تۋرالى اقپاراتتى جەدەل تۇردە ناقتىلاۋدى، قۇتقارۋ جۇمىستارىن جان-جاقتى جۇرگىزۋدى جانە قۇرباندار مەن زارداپ شەككەندەر سانىن بارىنشا ازايتۋدى تاپسىردى.
— جەر سىلكىنىسىنەن زارداپ شەككەن ايماق بيىك تاۋلى ايماقتا، تەمپەراتۋراسى تومەن ۇستىرتتە ورنالاسقاندىقتان، زارداپ شەككەن اۋدان تۇرعىندارى قىستان امان شىعۋى ءۇشىن ولاردىڭ نەگىزگى تۇرمىستىق قاجەتتىلىكتەرىن بارىنشا قامتاماسىز ەتۋ قاجەت، - دەپ كەلتىردى Xinhua قىتاي پرەمەرىنىڭ ءسوزىن.
سينوپتيكتەر بولجامىنشا، سەيسەنبى كۇنى دينجي ۋەزىندە اۋانىڭ تەمپەراتۋراسى مينۋس 18 گرادۋستان ءنول گرادۋسقا دەيىن قۇبىلادى.
بۇدان بولەك، جەر سىلكىنىسىنە بايلانىستى چومولۋڭما تاۋىنىڭ تۋريستىك ايماعى ۋاقىتشا جابىلدى.
ەسكە سالساق، بۇعان دەيىن قىتايدىڭ شيزاڭ اۆتونوميالىق اۋدانىنىڭ ريگازە قالاسىنداعى دينجي ۋەزىندە ماگنيتۋداسى 6,8 بالدىق جەر سىلكىنىسى بولعانىن حابارلاعان ەدىك. كەشە جويقىن جەر سىلكىنىسىنەن قازا بولعاندار سانى 95 كە جەتكەنى ءمالىم بولدى. الايدا قازىرگى ۋاقىتتا 126 ادام كوز جۇمىپ، 188 ادام زارداپ شەككەنى حابارلاندى.
اۆتور
زارينا تۋعانبايەۆا
