قىتاي، جاپونيا جانە وڭتۇستىك كورەيا ۇكىمەت باسشىلارى ءتورت جىلدا ءبىرىنشى رەت كەلىسسوز جۇرگىزدى

سەۋل. KAZINFORM - قىتاي-جاپونيا-وڭتۇستىك كورەيا باسشىلارىنىڭ توعىزىنشى كەزدەسۋى 27-مامىر كۇنى وڭتۇستىك كورەيانىڭ استاناسى سەۋلدە ءوتتى، دەپ حابارلايدى Kyodo News.

جيىنعا قىتاي پرەمەر-ءمينيسترى لي جياڭ، جاپونيا پرەمەر- ءمينيسترى فۋميو كيشيدا جانە وڭتۇستىك كورەيا پرەزيدەنتى يۋن سوك يۋە قاتىسىپ، كەزدەسۋدەن كەيىن ورتاق مالىمدەمە جاسادى.

بۇل - ءۇش ەلدىڭ ۇكىمەت باسشىلارىنىڭ 2019 -جىلدىڭ جەلتوقسانىنان بەرگى ءتورت جىلدان استام ۋاقىتتاعى العاشقى ديالوگى.

كەزدەسۋ قورىتىندىسى بويىنشا قاتىسۋشىلار ءۇش ەل اراسىنداعى ىنتىماقتاستىق قارىم- قاتىناستاردى نىعايتۋ، اسىرەسە 2019 -جىلدان بەرى توقتاتىلعان جاپونيا- قىتاي- وڭتۇستىك كورەيا ەركىن ساۋدا كەلىسىمىنە (FTA) قول قويۋ كەلىسسوزىن قالپىنا كەلتىرۋ بويىنشا ورتاق مامىلەگە كەلدى.

قىتاي پرەمەر-ءمينيسترى لي جياڭ مۇنى جاڭا باستاما دەپ سيپاتتادى، سونىمەن قاتار ول بارلىق ەلدەردى اشىق كوزقاراسپەن جانە اشىق شارالارمەن قىتاي، جاپونيا جانە وڭتۇستىك كورەيا اراسىنداعى ىنتىماقتاستىقتى قالپىنا كەلتىرۋگە، ەكونوميكالىق جانە ساۋدا پروتەكتسيونيزمىنە قارسى تۇرۋعا جانە ەركىن ساۋدا مەن ەكونوميكالىق جاھاندانۋدى قورعاۋعا شاقىردى.

لي جياڭ سامميتتە كورەي تۇبەگىندەگى بارلىق تاراپتاردى سابىر تانىتىپ، جاعدايدىڭ ودان ءارى شيەلەنىسۋىنە جول بەرمەۋدى سۇرادى.

وڭتۇستىك كورەيا پرەزيدەنتى يۋن سوك يۋە باسپا ءسوز ءماسليحاتىندا الداعى ۋاقىتتا ءۇشجاقتى سامميتتەر تۇراقتى وتەتىنىن مالىمدەدى.

ءۇش ەلدىڭ كوشباسشىلارى ءبىراۋىزدان سولتۇستىك كورەيانى يادرولىق قارۋسىزداندىرۋ جانە كورەي تۇبەگىندە بەيبىتشىلىكتى ساقتاۋ - قىتاي، جاپونيا جانە وڭتۇستىك كورەيانىڭ ورتاق مۇددەسى مەن جاۋاپكەرشىلىگى ەكەنىن مالىمدەدى.