قىتاي حالىقارالىق ىنتىماقتاستىق اياسىندا ا ق ش- قا ەكى الىپ پاندا جىبەرەدى

ق ح ر ءتوراعاسى شي جينپيڭ بۇل تۋرالى بەيسەنبى كۇنى ا ق ش- قا مەملەكەتتىك ساپارى اياسىندا اق ۇيدە وتكەن قارسى الۋ راسىمىندە مالىمدەدى. ونىڭ ايتۋىنشا، بىرنەشە كۇننەن كەيىن پينپين مەن فۋشۋان اتلانتا حايۋاناتتار باعىندا ورنالاسىپ، امەريكالىق كورەرمەندەرگە تانىستىرىلادى.

وتكەن جىلى قىتايدىڭ جابايى تابيعاتتى قورعاۋ قاۋىمداستىعى مەن اتلانتا حايۋاناتتار باعى الىپ پاندالاردى قورعاۋ سالاسىنداعى حالىقارالىق ىنتىماقتاستىق تۋرالى كەلىسىمگە قول قويعان.

كەلىسىمگە سايكەس، قىتايدىڭ وڭتۇستىك-باتىسىنداعى سىچۋان پروۆينتسياسىنىڭ چىندۋ قالاسىنداعى الىپ پاندالاردى زەرتتەۋ جانە ءوسىرۋ بازاسىندا تاربيەلەنگەن پينپين اتتى ەركەك جانە فۋشۋان اتتى ۇرعاشى پاندا بامبۋك ايۋلارىن قورعاۋ جونىندەگى 10 جىلدىق ىنتىماقتاستىق باعدارلاماسى اياسىندا ا ق ش- قا جىبەرىلەدى.

ەكى پانداعا بارىنشا قولايلى جاعداي جاساۋ ءۇشىن امەريكالىق تاراپ قىتايلىق مامانداردىڭ تەحنيكالىق قولداۋىمەن ولاردىڭ ۆولەرلەرىن جاڭارتىپ، جاڭعىرتۋدان وتكىزدى.

پاندالار قىتاي مەن ا ق ش اراسىنداعى دوستىقتىڭ سيمۆولىنا اينالدى

قىتاي مەن ا ق ش- تىڭ الىپ پاندالاردى قورعاۋ سالاسىنداعى بايلانىسىنىڭ تاريحى ۇزاق جىلدارعا سوزىلادى. 1972-جىلعى ساۋىردە ا ق ش- تىڭ سول كەزدەگى پرەزيدەنتى ريچارد نيكسوننىڭ سول جىلدىڭ اقپانىندا قىتايعا جاساعان ساپارىنان كەيىن لينلين جانە سينسين ەسىمدى ەكى پاندا ا ق ش- قا جەتكىزىلگەن.

ولاردى جاڭبىرعا قاراماستان 8 مىڭنان استام امەريكالىق قارسى العان. لينلين مەن سينسين كوپشىلىككە كورسەتىلە باستاعان العاشقى ايدا ميلليوننان استام ادامدى حايۋاناتتار باعىنا جيناعان. وسىلايشا الىپ پاندا قىتاي مەن ا ق ش حالىقتارىنىڭ اراسىنداعى دوستىقتى نىعايتاتىن ماڭىزدى بايلانىسقا اينالدى.

قىتاي مەن ا ق ش- تىڭ الىپ پاندالاردى قورعاۋ سالاسىنداعى ىنتىماقتاستىعى قىتايدىڭ جابايى تابيعاتتى قورعاۋ باعىتىنداعى ەڭ ۇزاق ءارى اۋقىمدى حالىقارالىق باستامالارىنىڭ ءبىرى سانالادى. 1994-جىلى قىتايدىڭ جابايى تابيعاتتى قورعاۋ قاۋىمداستىعى مەن سان-ديەگو حايۋاناتتار باعى وكىلدەرى كەلىسىمگە قول قويىپ، الىپ پاندالاردى قورعاۋ سالاسىنداعى ەكىجاقتى ىنتىماقتاستىقتىڭ نەگىزىن قالادى.

سوڭعى ءۇش ونجىلدىقتا تاراپتار پاندالاردىڭ مىنەز-قۇلقى، قورەكتەنۋى، گەنەتيكاسى جانە اۋرۋلاردىڭ الدىن الۋ سياقتى ماڭىزدى باعىتتار بويىنشا بىرلەسكەن زەرتتەۋلەر جۇرگىزىپ، ولاردى كوبەيتۋ ادىستەرىندە ەلەۋلى جەتىستىكتەرگە قول جەتكىزدى.

وسى ىنتىماقتاستىقتىڭ ناتيجەسىندە ا ق ش- تاعى پاندالار 17 بولتىرىكتى دۇنيەگە اكەلىپ، ءوسىرىپ شىعاردى. ونىڭ التاۋى سان-ديەگودا، تورتەۋى ۆاشينگتوندا، تاعى جەتەۋى اتلانتادا دۇنيەگە كەلگەن.

2024-جىلى قىتاي مەن ا ق ش بۇل سالاداعى ىنتىماقتاستىقتىڭ جاڭا كەزەڭىن باستاپ، سودان بەرى الىپ پاندالار ا ق ش- قا كەزەڭ-كەزەڭىمەن جەتكىزىلىپ كەلەدى.

ساراپشىلاردىڭ پىكىرىنشە، ەكىجاقتى ىنتىماقتاستىقتىڭ جاڭا كەزەڭى پاندالار اراسىندا كەڭ تارالعان اۋرۋلاردىڭ الدىن الۋ مەن ەمدەۋدە، سونداي-اق عىلىمي-تەحنيكالىق الماسۋدا جاڭا ناتيجەلەرگە قول جەتكىزۋگە مۇمكىندىك بەرەدى. بۇل جاھاندىق بيوالۋانتۇرلىلىكتى قورعاۋعا جانە قىتاي مەن ا ق ش حالىقتارى اراسىنداعى دوستىقتى نىعايتۋعا ۇلەس قوسپاق.

ەسكە سالساق، كەشە ق ح ر ءتوراعاسى شي جينپيڭ ا ق ش پرەزيدەنتى دونالد ترامپتىڭ اق ۇيدە قىتاي باسشىسىنىڭ ا ق ش- قا ءۇش كۇندىك مەملەكەتتىك ساپارىنا وراي ۇيىمداستىرعان قارسى الۋ راسىمىنە قاتىستى.