قىتاي ءوز جەلىسىن 5G-A ستاندارتىنا دەيىن جاڭارتۋدى كوزدەپ وتىر
بەيجىڭ. KAZINFORM - قىتاي بيلىگى 5G جەلىسىن 5G-A ستاندارتىنا دەيىن جاڭارتۋدى جوسپارلاپ وتىر. 5G-A جەلىسى قىزمەتتەرى بەيجىڭ مەن شاڭحايدا ۇسىنىلا باستادى. بۇل تۋرالى Xinhua اقپارات اگەنتتىگى جازدى.
مەملەكەتتىك دەرەكتەر باسقارماسى جاريالاعان دەرەكتەر ينفراقۇرىلىمىن قۇرۋ جونىندەگى ديرەكتيۆانىڭ جوباسى ق ح ر 5G جەلىسىن 5G-A ستاندارتىنا دەيىن جاڭارتۋدى جانە 6G-گە قاتىستى زەرتتەۋلەردى، ازىرلەمەلەر مەن يننوۆاتسيالاردى جان-جاقتى ىنتالاندىرۋدى كوزدەپ وتىر.
5G-A جەلىسى جىلدامدىعى، كىدىرىسى، قوسىلىم اۋقىمى جانە قۋات تۇتىنۋى جاعىنان قازىرگى 5G جەلىسىنەن اسىپ تۇسەدى، ونىڭ دەرەكتەردى بەرۋدىڭ ماكسيمالدى جىلدامدىعى جۇكتەۋ ءۇشىن 10 گبيت/س، جۇكتەپ سالۋ ءۇشىن 1 گبيت/س جەتەدى، ۋاقىت كىدىرىسى ميلليسەكۋندتاردى قۇرايدى، ال ينتەرنەتكە قوسىلۋى ەڭ از شىعىنمەن ورىندالادى.
سونىمەن قاتار، قىتاي حالىقارالىق سۋ استى جانە جەرۇستى كابەلدىك اقپارات ارنالارىن كەڭەيتۋدى، سونداي-اق عارىشتىق جانە جەرۇستى بايلانىس قۇرالدارىن بىرىكتىرەتىن سپۋتنيكتىك ينتەرنەت قۇرۋدى جوسپارلاپ وتىر.
بۇعان دەيىن قىتايدىڭ نانكين، ۋحان، تسينداو، شەنچجەن، سۋچجوۋ، شاڭحاي، نينبو، گۋاڭجوۋ، شەنيان جانە چىندۋ قالالارىندا «5G+ وندىرىستىك ينتەرنەت» تەحنولوگيالارىن ەنگىزۋ بويىنشا پيلوتتىق باعدارلامانى ىسكە قوسقانى بەلگىلى بولدى. بۇل قالالار 5G نەگىزىندە ونەركاسىپتىك كلاستەرلەر مەن يننوۆاتسيالىق ەكوجۇيەلەردى دامىتۋعا نازار اۋدارادى.
ەسكە سالساق، قىتايدا 5G جەلىسىن پايدالانۋشىلار سانى 1 ميللياردتان اسقانىن جازعان بولاتىنبىز.
