قىتاي عارىشتا 14 ءتۇرلى وسىمدىك ءوسىرىپ جاتىر
قىتاي عارىشتا وسىمدىكتەردىڭ 14 ءتۇرىن ءوسىرىپ، عارىش ستانتسياسىندا اۋىل شارۋاشىلىعى داقىلدارىن اۋقىمدى كولەمدە وسىرۋگە نەگىز قالادى.
قىتاي عارىشكەرلەرىن دايارلاۋ ورتالىعىنىڭ مالىمەتىنشە، «تيانگۋن» عارىش ستانتسياسىندا سالات جاپىراعى، ءسابىز، كۇنباعىس، كارتوپ جانە بيداي ءوسىرىلىپ جاتىر. 2025 -جىلى ستانتسياعا وسىمدىكتەردى اەروپونيكا ادىسىمەن، ياعني توپىراقسىز وسىرۋگە ارنالعان تيىمدىلىگى جوعارى قوندىرعى جەتكىزىلدى.
بيداي عارىشتا ءوسۋدىڭ تولىق سيكلىنەن ءوتىپ ۇلگەردى. قازىر جينالعان تۇقىمنان الىنعان ەكىنشى ءونىمنىڭ دە ءتۇسىمى جاقىنداپ قالدى.
ورتالىقتىڭ مالىمەتىنشە، ستانتسيادا وسىمدىكتەردى وسىرۋگە ارنالعان ەكى جۇيە تۇراقتى جۇمىس ىستەيدى. ونىڭ ءبىرى ارنايى سۋبستراتتى پايدالانسا، ەكىنشىسى اەروپونيكا ادىسىنە نەگىزدەلگەن. بۇل جۇيەلەر سۋدى، اۋانى جانە ازىق-تۇلىكتى تىكەلەي عارىشتا الىپ، قايتا وڭدەۋگە مۇمكىندىك بەرەتىن تۇيىق تىرشىلىكتى قامتاماسىز ەتۋ جۇيەسىن ازىرلەۋ ءۇشىن قولدانىلىپ جاتىر.
قىتاي ايدى يگەرۋدىڭ كەلەسى كەزەڭدەرى اياسىندا «اي باعىن» دا قۇرۋدى جوسپارلاپ وتىر.
ايتا كەتەيىك، قازاقستان مەن كورەيا عارىش سالاسىندا جاڭا جوبالاردى ىسكە قوسادى.
Egemen.kz
