قىتاي عالىمدارى جويقىن جەر سىلكىنىسىن بولجادى ما - سەيسمولوگيا ينستيتۋتىنىڭ جاۋابى

الماتى. KAZINFORM - سەيسمولوگيالىق باقىلاۋ جانە زەرتتەۋلەر ۇلتتىق عىلىمي ورتالىعى (بۇرىنعى سەيسمولوگيا ينستيتۋتى) جەلىدە تاراعان جويقىن جەر سىلكىنىسى تۋرالى اقپاراتقا بايلانىستى مالىمدەمە جاسادى.

عىلىمي ورتالىقتىڭ مالىمەتىنشە، جەلىدەگى اقپاراتقا قىتاي عالىمدارىنىڭ جويقىن جەر سىلكىنىسىن بولجاۋى سەبەپ بولعان. ءبىراق قازاقستاندىق سەيسمولوگتار بۇل بولجامنىڭ ەلىمىزگە تىكەلەي قاتىسى جوق ەكەنىن ەسكەرتتى.

- پەكين جەر سىلكىنىسى اگەنتتىگى، اتاپ ايتقاندا چجۋ حۋنبين باستاعان عالىمدار توبى شامامەن 30-40 جىلدا ءبىر رەت ماگنيتۋداسى 8 نەمەسە ودان دا كوپ كۇشتى جەر سىلكىنىستەرى بولاتىن تسيكل تۋرالى بولجام جاسادى. وسى مالىمەتتەرگە سۇيەنە وتىرىپ، عالىمدار توبى تسيكل قازىر باستالىپ جاتقان شىعار دەپ بولجايدى. زەرتتەۋدە ايتىلعان ايماقتىڭ قازاقستانعا ەش قاتىسى جوق. ويتكەنى بۇلار قىتايدىڭ سىۋچان جانە يۋننان ايماقتارى، لونگمەنشان جارىلىم ايماعىندا، ياعني جاقىندا جويقىن جەر سىلكىنىسى بولعان ميانماعا جاقىن جەردە. ول ايماق قازاقستاننان مىڭداعان شاقىرىم جەردە. بۇل وتە الىس جانە باسقا سەيسميكالىق ايماق، - دەپ حابارلادى عىلىمي ورتالىق.

سونىمەن قاتار سەيسمولوگيا ينستيتۋتىنىڭ مالىمدەمەسىنە سايكەس، ەش جاعدايدا عالىمداردىڭ زەرتتەۋلەرىن جانە بولجامدارىن ناقتى مالىمەت دەپ قاراستىرۋعا بولمايدى. ۇلتتىق عىلىمي ورتالىق ازاماتتاردى دۇربەلەڭگە تۇسپەۋگە جانە الەۋمەتتىك جەلىدەگى اقپاراتقا سىني كوزقاراسپەن قاراۋعا شاقىردى.

- «قىتاي عالىمدارى 8 بالدان جوعارى جەر سىلكىنىسىن بولجادى» دەگەن تاقىرىپتاردى سەنىمسىز جانە اداستىرۋ دەپ اتاۋعا بولادى، - دەپ مالىمدەدى ينستيتۋت.

ەسكە سالايىق، ناۋرىز ايىنىڭ سوڭىندا جامبىل وبلىسىندا بىرنەشە رەت جەر ءدۇمپۋى بولدى.

ءدال سول ۋاقىتتاردا ميانمادا 7,9 بالدىق جەر سىلكىنىسى تىركەلدى.

وسىعان وراي ءبىز قازاقستان مەن وڭتۇستىك-شىعىس ازيادا بولعان جەر سىلكىنىسىنىڭ بايلانىسى تۋرالى جازعانبىز.