قىتاي عالىمدارى ءماتىندى ويشا تەرۋگە مۇمكىندىك بەرەتىن قۇرىلعى جاساپ شىعاردى

استانا. KAZINFORM - قىتاي عالىمدارى پەرنەتاقتاعا قول تيگىزبەي-اق، مي سيگنالدارى ارقىلى ءماتىن تەرۋگە مۇمكىندىك بەرەتىن قۇرىلعى ازىرلەدى. ارنايى داتچيكتەرى بار باسكيىم سىناق كەزىندە 94 پايىزدان جوعارى دالدىك كورسەتكەن. ەڭ باستىسى، ونى پايدالانۋ ءۇشىن ادامنىڭ ميىنا ەشقانداي چيپ ورناتۋدىڭ قاجەتى جوق، دەپ حابارلايدى turkystan.kz.

ми
Фото: turkystan.kz

قۇرىلعىنىڭ جۇمىس ىستەۋ ءپرينتسيپى قاراپايىم: ادام ەكرانداعى ۆيرتۋالدى پەرنەتاقتاعا قاراپ، قاجەتتى تاڭباعا نازار اۋدارادى. ال باسكيىمگە ورناتىلعان ەلەكترودتار ميدىڭ ەلەكترلىك سيگنالدارىن تىركەپ، كومپيۋتەرگە جەتكىزەدى. جۇيە وسى سيگنالدار ارقىلى ادامنىڭ قاي تاڭبانى تاڭداعانىن انىقتايدى.

تاجىريبە بارىسىندا قاتىسۋشىلار ەكرانداعى جىپىلىقتايتىن پەرنەتاقتاعا قاراپ، 1 دەن 9 عا دەيىنگى سانداردى جانە كۇندى تەرگەن. ناتيجەسىندە جۇيەنىڭ دالدىگى 94 پايىزدان اسقان.

عالىمدار قۇرىلعىنى ۇزاق ۋاقىت پايدالانۋعا دا بولاتىنىن انىقتادى. ارنايى ەلەكترودتار ادام ءجۇرىپ-تۇرعاندا، تاماق ىشكەندە جانە كىتاپ وقىعاندا سەگىز ساعاتتان استام ۋاقىت بويى مي سيگنالدارىن تۇراقتى تىركەگەن. ال تىنىشتىق جاعدايىندا قۇرىلعى 14 ساعاتتان اسا جۇمىس ىستەگەن.

مۇنداي ناتيجەگە ادامنىڭ تەرىسىنە بەيىمدەلەتىن جاڭا ەلەكترودتاردىڭ ارقاسىندا قول جەتكىزىلگەن. ولار باسقا تيەتىن تۇسىندا جۇمساق، ال قۇرىلعىعا جالعاناتىن بولىگىندە قاتتىراق بولادى. سونىڭ ناتيجەسىندە ادام قوزعالعان كەزدە دە سيگنال ساپاسى ساقتالادى.

دەگەنمەن بۇل تەحنولوگيا ادامنىڭ كەز كەلگەن ويىن وقي الادى دەگەن ءسوز ەمەس. قۇرىلعى ازىرگە ەكرانداعى تاڭبالارعا نازار اۋدارعان كەزدە پايدا بولاتىن مي سيگنالدارىن انىقتايدى.

عالىمداردىڭ پىكىرىنشە، بولاشاقتا مۇنداي تەحنولوگيا قوزعالىسى شەكتەلگەن ادامداردىڭ كومپيۋتەرمەن بايلانىسۋىنا كومەكتەسۋى مۇمكىن. سونداي-اق ونى ۇيقىنى باقىلاۋ، كۇندەلىكتى مەديتسينالىق تەكسەرۋ جانە ەپيلەپسيا ۇستاماسى تۋرالى ەرتە ەسكەرتۋ جۇيەلەرىندە قولدانۋ مۇمكىندىگى قاراستىرىلىپ جاتىر.

زەرتتەۋ ناتيجەلەرى Flexible Electronics عىلىمي جۋرنالىندا جاريالاندى.