قىتاي بيلىگى ءوز ازاماتتارىن ليۆاننان تەز ارادا كەتۋگە شاقىردى

استانا. KAZINFORM - قىتاي بيلىگى قىتاي ازاماتتارىنا ليۆاننان مۇمكىندىگىنشە تەزىرەك كەتۋدى ۇسىنادى. بۇل تۋرالى بەيرۋتتاعى قىتاي ەلشىلىگى ءمالىم ەتتى، دەپ جازادى تاسس.

«سوڭعى ۋاقىتتا ليۆاندا قاۋىپسىزدىك سالاسىنداعى كۇردەلى ءارى قيىن جاعداي ۇنەمى بايقالىپ كەلەدى، ليۆان- يزرايل شەكاراسىنداعى شيەلەنىس ءالى جالعاسىپ جاتىر. جاعدايدى مۇقيات قاداعالاپ، قاۋىپسىزدىك تۋرالى حاباردارلىق دەڭگەيىن (قامتاماسىز ەتۋ تۇرعىسىنان) ارتتىرۋ قاجەتتىگىن ەسكە سالامىز»، - دەلىنگەن تاراتىلعان مالىمدەمەدە.

قىتاي ديپلوماتيالىق ميسسياسى «وتانىنا ورالۋ نەمەسە ليۆاننان مۇمكىندىگىنشە تەزىرەك كەتۋ ءۇشىن ءالى دە بار كوممەرتسيالىق رەيستەردى پايدالانۋ قاجەتتىلىگىن ايتتى. تاياۋ شىعىس ەلىندە قالۋعا شەشىم قابىلداعاندار «تاۋەكەلدەردەن اۋلاق بولىپ، قىراعىلىقتى ساقتاۋ، قاۋىپسىزدىك شارالارى مەن توتەنشە جاعدايلارعا دايىندىقتى ءتيىمدى كۇشەيتۋى» كەرەك.

سونىمەن قاتار ەلشىلىك ق ح ر ازاماتتارىنا ليۆاننىڭ وڭتۇستىگىندەگى اسا قاۋىپتى ايماقتارعا بارماۋعا كەڭەس بەردى.

«توتەنشە جاعدايدا پوليتسياعا حابارلاسىڭىز جانە قىتاي ەلشىلىگىنە حابارلاسىڭىز»، - دەلىنگەن حابارلامادا.

يزرايل مەن ليۆانداعى «حەزبوللا» توبىنىڭ ءوزارا شابۋىلى جالعاسىپ جاتىر. تۇراقتى شيەلەنىستەرگە بايلانىستى يزرايل شەكارالىق ايماقتان 80 مىڭنان استام ازاماتىن ەۆاكۋاتسيالادى.

بۇعان دەيىن قازاقستاننىڭ سىرتقى ىستەر مينيسترلىگى قازاقستاندىقتارعا يزرايل مەن ليۆانعا بارۋدان ۋاقىتشا باس تارتۋدى ۇسىنعان بولاتىن. ا ق ش ازاماتتارىن ليۆاننان ەۆاكۋاتسيالاۋعا دايىندالىپ جاتقانىن جازعان بولاتىنبىز.

اۆتور
ەركەجان سماعۇلوۆا