قىتاي بانكىنىڭ بۇرىنعى مەنەدجەرى سىبايلاس جەمقورلىق ءۇشىن ءومىر بويىنا باس بوستاندىعىنان ايىرىلدى
1993-2001-جىلدار ارالىعىندا قىتاي بانكى فيليالىنىڭ باسشىسى بولعان سيۋي گوتسزيۋنگە قىتايداعى ەڭ ءىرى سىبايلاس جەمقورلىق ىسىنە قاتىستى 2,3 ميلليارد يۋان (325 ميلليون دوللار) جىمقىردى دەگەن ايىپ تاعىلىپ، ءومىر بويىنا باس بوستاندىعىنان ايىرىلدى.
Kazinform بۇل تۋرالى BBC جاڭالىقتارىنا سىلتەمە جاساپ حابارلايدى.
سوت مالىمدەمەسىنە سايكەس، سيۋي جانە قىتاي بانكىنىڭ تاعى ەكى قىزمەتكەرى امالىن تاۋىپ جالعان نەسيە العان. ەكى سىبايلاسى بۇعان دەيىن 12 جانە 13 جىلعا باس بوستاندىعىنان ايىرىلعان.
2001-جىلى ا ق ش- قا قاشىپ كەتكەن سيۋي ەكى جىل بۇرىن ەلىنە كۇشتەپ قايتارىلدى. ول سوت ۇكىمىنە شاعىمدانبايتىنىن ايتتى. سونىمەن قاتار ونىڭ بار مۇلكى تاركىلەندى. جەرگىلىكتى ب ا ق- تىڭ حابارلاۋىنشا، قازىرگى ۋاقىتتا ۇرلانعان اقشانىڭ 2 ميلليارد يۋاننان استامى وندىرىلگەن.
بۇل پرەزيدەنت شي جينپيڭنىڭ قارجى سەكتورىنداعى سىبايلاس جەمقورلىققا قارسى ناۋقانىنداعى سوڭعى جاڭالىق. مەملەكەتتىك بانكتەردىڭ باسقا دا جوعارى لاۋازىمدى قىزمەتكەرلەرى ايىپپۇل تولەپ، قاماۋعا الىندى نەمەسە تەرگەلىپ جاتىر.
قازان ايىندا قىتاي بانكىنىڭ بۇرىنعى ءتوراعاسى ليۋ ليانگە پارا الدى جانە زاڭسىز نەسيە الدى دەگەن كۇدىكپەن قاماۋعا الىندى. China Life Insurance كومپانياسىنىڭ بۇرىنعى ءتوراعاسى ۆان بين قىركۇيەكتە ءومىر بويىنا باس بوستاندىعىنان ايىرىلدى. ول دا سىبايلاس جەمقورلىققا كىنالى دەپ تانىلدى.
