قىتاي بالا تۋۋدى قولداۋ ءۇشىن جاڭا شارالار قابىلدادى - شەتەلدەگى قازاق باسپا ءسوزى
Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
قىتاي بالا تۋۋدى قولداۋ ءۇشىن جاڭا شارالار قابىلدادى - «حالىق گازەتى»
مەملەكەتتىك كەڭەستىڭ باس باسقارماسى 28-قازان كۇنى قۇجات جاريالاپ، بالا تۋۋ، بالا كۇتىمى جانە ءبىلىم بەرۋ شىعىندارىن ازايتۋ بويىنشا ءبىرقاتار جاڭا شارا جاريالادى.
بۇل تۋرالى وسى اپتادا قىتايدىڭ «حالىق گازەتى» حابارلادى.
قىتايلىق ب ا ق- تىڭ كەلتىرگەن مالىمەتتەرىنە سۇيەنسەك، قۇجاتتا بالا تۋۋ قىزمەتتەرىن قولداۋدى كۇشەيتۋ، بالا كۇتىمىنە قىزمەت كورسەتۋ جۇيەسىنىڭ قۇرىلىسىن نىعايتۋ، ءبىلىم بەرۋ، تۇرعىن ءۇي جانە جۇمىسپەن قامتۋدا قولداۋدى ارتتىرۋ سياقتى شارالار كوزدەلگەن. سونداي- اق بالا تۋۋعا قولايلى الەۋمەتتىك اتموسفەرانى قالىپتاستىرۋدىڭ 4 اسپەكتىسى بويىنشا 13 ناقتى شارا ۇسىنىلعان. سول ارقىلى بۇكىل قوعام بالالى بولۋدى قۇرمەتتەيتىن جانە قولدايتىن جاقسى اتموسفەرا قالىپتاستىرماق.
سونداي- اق وسى اپتادا «حالىق گازەتى» باسىلىمىندا «قىتاي جىلىنا 10 مىڭعا دەيىن ۇشاتىن كولىك شىعارماق» دەگەن تاقىرىپتاعى حابار جاريالادى.
قىتاي جىلىنا 10 مىڭعا دەيىن ۇشاتىن كولىك شىعارماق
اتاپ ايتقاندا وتكەن جەكسەنبىدە قىتايدىڭ وڭتۇستىگىندەگى گۋاندۋن پروۆينتسياسىنىڭ ورتالىعى گۋاڭجوۋدا الەمدەگى العاشقى ينتەللەكتۋالدى ۇشاتىن كولىك شىعاراتىن بازانىڭ قۇرىلىسى باستالدى.
قىتايلىق ب ا ق- تىڭ دەرەگىنشە، XPENG ۇشاتىن اۆتوكولىكتەردىڭ ەنشىلەس كاسىپورنى XPENG AEROHT تاپسىرىس بەرگەن وندىرىستىك بازا ۇشاتىن اۆتوموبيلدەردى شىعاراتىن الەمدەگى العاشقى سەريالىق زاۋىت بولادى.
بازانىڭ مالىمەتتەرىنشە زاۋىت كولەمى 180 مىڭ شارشى مەتر اۋماقتى الىپ جاتىر. بولاشاق جوبا بويىنشا جىلىنا 10 مىڭ ۇشاتىن كولىك شىعارماق.
اتالعان كولىك العاشقى رەيسىن وسى جىلدىڭ قىركۇيەگىندە جاساعان بولاتىن، ال العاشقى ساتىلىمى 2024 -جىلدىڭ سوڭىندا باستالماق.
اپتا سوڭىنا قاراي «حالىق گازەتىندە» «قورعاس ەركىن ساۋدا ايماعىندا العاشقى توعىز ايدا يمپورت- ەكسپورتتىڭ جالپى قۇنى 37 ميلليارد يۋاننان استى» دەگەن تاقىرىپتاعى اقپارات جارىق كوردى.
قىتايلىق ب ا ق- تىڭ كەلتىرگەن دەرەكتەرىنە سۇيەنسەك، باس كەدەن باسقارماسىنىڭ ستاتيستيكاسىنا سايكەس، بيىل قاڭتار- قىركۇيەك ايلارى ارالىعىندا قورعاس كەشەندى ەركىن ساۋدا ايماعىندا يمپورت پەن ەكسپورتتىڭ جالپى قۇنى 37,356 ميلليارد يۋانعا جەتىپ، ءبىر جىلمەن سالىستىرعاندا %30,8 عا وسكەن.
ءسويتىپ، ەلدەگى 160 كەشەندى ەركىن ساۋدا ايماعىنىڭ ىشىندە 33-ورىنعا جانە شىڭجاڭداعى كەشەندى ەركىن ساۋدا ايماقتارىنىڭ اراسىندا 2-ورىنعا يە بولدى.
بەلگراد حالىقارالىق كىتاپ كورمەسىندە يراندىق ءۇش جاڭا كىتاپ تۇساۋى كەسىلدى - Parstoday
67- بەلگراد حالىقارالىق كىتاپ كورمەسىندە سەرب تىلىنە اۋدارىلعان يراندىق ءۇش كىتاپتىڭ تۇساۋى كەسىلدى، دەپ حابارلايدى Parstoday اقپارات اگەتتىگى.
اتالعان باسىلىمنىڭ مالىمەتىنشە، ي ي ر- نىڭ مادەني كەڭەس بەرۋ مەكەمەسىنىڭ ىنتىماقتاستىعىمەن «يمام رەزا - پايعامبار اۋلەتىنىڭ داناسى»، «ديۆان حافيز» جانە «نۇر» اتتى ءۇش يراندىق كىتاپتىڭ اشىلۋ ءراسىمى سەربيادا، بەلگراد حالىقارالىق كىتاپ كورمەسىنىڭ «ياۆانوۆيچ زاماي» زالىندا ءوتتى.
بۇل كىتاپتى الەكساندر دراگوۆيچ اۋدارىپ، «سەرجان ماركوۆيچ» باسپاسىنان شىعارعان.
سەربيا ادەبي بىرلەستىگىنىڭ باسشىسى نەناد ميلوشيەۆيچ تە وسى راسىمدە يراننىڭ ايگىلى اقىنى حافەزدىڭ تۇلعاسى تۋرالى پىكىر ءبىلدىرىپ، حافەزدىڭ ليريكاسىنا ىقىلاسى بولەك ەكەنىن ايتتى.
سونداي- اق ميلوشيەۆيچ «ديۆان حافيزدىڭ» سەربيادا باسىلۋىن وسى ۇلى يراندىق اقىندى سەرب قوعامىنا تانىتۋداعى قۇندى قادام دەپ ساناعان.
سونىمەن قاتار «Parstoday» - دە «ماسكەۋ حالىقارالىق كورمەسىندە يران ونەرىن كەڭىنەن قابىلداۋ» دەگەن تاقىرىپتاعى اقپارات جارىق كورگەن بولاتىن.
اتالعان باسىلىمنىڭ دەرەگىنشە، ماسكەۋدە 50 يراندىق سۋرەتشىنىڭ جۇمىستارى قويىلعان حالىقارالىق زاماناۋي ونەر كورمەسى ءوتتى. ۇيىمداستىرۋشىلاردىڭ پىكىرىنشە، بۇل يراندىق سۋرەتشىلەردىڭ رەسەي نارىعىنا شىعۋىنا جاسالعان قادام بولۋى مۇمكىن.
ماسكەۋدە جەكسەنبى كۇنى كەشكە دەيىن جالعاسقان ءۇش كۇنگە سوزىلعان كورمەدە ونەر سۇيەر قاۋىم يراننىڭ زاماناۋي ونەرىمەن تانىسۋعا مۇمكىندىك العان.
Parstoday اقپارات اگەنتتىگىنىڭ حابارلاۋىنشا، Cosmoscow حالىقارالىق زاماناۋي ونەر كورمەسىندە يراندىق سۋرەتشىلەردىڭ تۋىندىلارىنا جەكە ءبولىم ارنالىپ، بەس ستەندتە 59 سۋرەت پەن 9 ونەر تۋىندىسى قويىلعان.
يران يسلام رەسپۋبليكاسىنىڭ ماسكەۋدەگى ەلشىلىگىنىڭ مادەني كەڭەسشىسى ماسۋد احمادۆاند وسى كورمەدە يراندىق تۋىندىلاردىڭ كەڭ كولەمدە قابىلدانۋىنا توقتالىپ، يراندىق سۋرەتشىلەر ءوز تۋىندىلارىندا وزدەرىنىڭ تامىرى مەن باي تاريحى مەن زاماناۋي مادەنيەت ۇردىستەرىنە بايلانىستى ۇلتتىق جانە الەمدىك داڭققا قول جەتكىزدى، دەگەن.
يران ونەرىنىڭ بۇل كورمەسى ماسكەۋدەگى يران ەلشىلىگىنىڭ مادەني كەڭەسىمەن جانە رەسەي مەن يران اراسىندا مادەني ديالوگ قۇرۋ سالاسىندا بەلسەندىلىك تانىتىپ جۇرگەن رەسەيلىك «Kulturing» كومپانياسىنىڭ قولداۋىمەن وتكىزىلگەن.
دارىگەر جۇماتاي اۋباكىر ۇلى مەملەكەت تاراپىنان ماراپاتتالدى — جەنمين جيباو
27-قىركۇيەك كۇنى مەملەكەتتىك ۇلتتىق بىرلىك پەن ۇلگىلى تۇلعالاردى ماراپاتتاۋ جونىندەگى جينالىسى بەيجيڭدە وتكىزىلگەن بولاتىن. اتالعان مەملەكەت دارەجەلى ماراپاتتاۋدا ىلە قازاق اۆتونوميالى وبلىسى تەكەس اۋدانىنا قاراستى بوزادىر اۋىلدىق ەمحاناسىنىڭ دارىگەرى جۇماتاي اۋباكىر ۇلى «مەملەكەتتىك ۇلتتار ىنتىماعىنداعى ۇلگىلى تۇلعا» اتاعىن الدى، دەپ حابارلايدى قىتايدىڭ «جەنمين جيباو» اقپاراتتىق پورتالى.
اتالعان ب ا ق- تىڭ دەرەگىنشە، ول تەڭىز دەڭگەيىنەن 3000 مەتر بيىكتىكتەگى بوزادىر دەپ اتالاتىن مالشىلار تۇراتىن شالعايداعى تاۋلى قىستاقتا 30 جىلداي ۋاقىت جەرلەستەرىنىڭ دەنساۋلىعىنا جاۋاپتى دارىگەر بولىپ قىزمەت اتقارعان.
دارىگەر وتباسىندا دۇنيەگە كەلگەن جۇماتاي اكەسىنىڭ جولىن قۋىپ، دارىگەر بولۋدى تاڭداعان. ول وتكەن عاسىردىڭ 90-جىلدارىنىڭ باسىندا قۇلجا قالاسىنان دارىگەرلىك وقۋدى وقىپ بىتىرگەننەن كەيىن، بوزادىر اۋىلىنداعى ەمحاناعا كەلىپ قىزمەت ىستەي باستايدى. ج. اۋباكىر ۇلى جۇمىس ىستەيتىن وڭىردە نەگزىنەن مال شارۋاشىلىمەن اينالىساتىن ادامدار بولعاندىقتان دارىگەرلىك قىزمەتتى اتقارۋ بارىسىندا كوپتەگەن قيىندىقتار تۋىندايتىن ەدى.
قىتايلىق ب ا ق- تىڭ كەلتىرگەن دەرەگىنە سۇيەنسەك، جۇماتاي قىستىڭ قاقاعان ايازىندا، جازدىڭ شىلىڭگىر ىستىعىنا قاراماستان ناۋقاس قايدا بولسا سوندا، كۇن دەمەي، ءتۇن دەمەي جەرلەستەرى ءۇشىن قالتقىسىز ەڭبەك ەتكەن ايتۋلى دارىگەر بولا بىلگەن. سوندىقتان ول قانداي ماراپات السادا لايىق دەيدى بوزادىرلىق جەرلەستەرى.
«بوزادىر مالشىلارى وتە باقىتتى، ويتكەنى بىزدە جۇماتاي بار»، دەيدى مالشى جەكسەنباي سۇلتانعازى ۇلى اتتى جەلەسى.
مەملەكەت بويىنشا ۇزدىك تۇلعا دەپ 368 ازامات تاڭدالىپ، ماراپاتتالعان. دارىگەر جۇماتاي اۋباكىر ۇلى سول ۇزدىكتەردىڭ ءبىرى بولىپ تاڭدالعاندىقتان، ارنايى مەملەكەت بەرەتىن سىيلىقتى تاپسىرىپ الۋ ءۇشىن بەيجىڭگە شاقىرىلعان ەكەن.
ادىياماندا 3000 جىل بۇرىنعى 10 ەلدى مەكەن تابىلدى - TRT
تۇركيانىڭ وڭتۇستىك-شىعىسىنداعى قالا ادىياماننىڭ كاحتا اۋدانىنداعى اتاتۇرىك بوگەت توعانىنىڭ جاعاسىندا جۇرگىزىلگەن ارحەولوگيالىق زەرتتەۋلەر ناتيجەسىندە 3 مىڭ جىل بۇرىنعى قونىستانۋ ايماعى انىقتالدى.
بۇل تۋرالى وسى اپتادا تۇركيا راديو تەليەۆيزيا پورتالى حابارلادى.
تۇركيالىق ب ا ق- تىڭ دەرەگىنشە، ادىيامان مۇراجاي باسقارماسى قىزمەتكەرلەرى بەلورەن اۋىلدىق ايماعىنداعى بوگەت توعانىنىڭ جاعاسىنداعى تاريحي ايماقتاردى انىقتاۋ ءۇشىن زەرتتەۋ جۇمىستارىن باستادى.
وڭىرگە بارعان ارنايى توپ ايماقتا بارلاۋ جانە قايىقپەن جاعالاردى زەرتتەۋ ارقىلى 3000 جىل بۇرىنعى 10 ەلدى مەكەندى انىقتاعان.
ادىيامان مۇراجايىنىڭ ديرەكتورى مەحمەت الكاننىڭ ايتۋىنشا، مۇندا جارتاس قالاشىقتارىنان تۇراتىن 10 ەلدى مەكەندى انىقتالعان. تابىلعان قىش ىدىستار سول داۋىردە ءومىر سۇرگەن ادامدار بولعانىن كورسەتەدى. سونىمەن قاتار دالالىق زەرتتەۋ بارىسىندا ارنا ءپىشىندى قۋىستار مەن بولمە ءتيپتى قونىس ايماقتارى تابىلعان.
اۆتور
بەيسەن سۇلتان
