قىتاي ايدىڭ ارعى جاعىن زەرتتەۋگە ارنالعان زوندتى ىسكە قوستى

Китай, космос
فوتو: شينحۋا

استانا. KAZINFORM - قىتاي «چانە-6» عارىش ميسسياسىنىڭ ۇشىرىلعانىن جاريالادى. ونىڭ اياسىندا كەيىنگى زەرتتەۋلەر ءۇشىن ايدىڭ از زەرتتەلگەن جاعىنان العاش رەت توپىراق جينالادى، دەپ حابارلايدى Euronews.

قىتاي ايدىڭ ارعى جاعىنا قونىپ، ونىڭ بەتىنەن توپىراق ۇلگىلەرىن جيناۋى كەرەك زوندتى ىسكە قوستى. 53 كۇندىك ميسسيا عارىشتى يگەرۋ تاريحىندا العاش رەت ورىندالىپ وتىر.

«چانە-6» زوندى بار زىمىران تاسىعىش حاينان ارالىنداعى «ۆەنچان» سپۋتنيكتىك ۇشىرۋ ورتالىعىنان جۇما كۇنى شىعىس ەۋروپا ۋاقىتىمەن ساعات 17:27-دە ۇشىرىلدى.

جوسپارعا سايكەس، عارىش اپپاراتى اي وربيتاسىنا جەتىپ، سودان كەيىن ونىڭ قونۋ مودۋلى وڭتۇستىك پوليۋس- ەيتكەن باسسەينىنە قونادى. بۇل - ايدىڭ جەردەن ەشقاشان كورىنبەيتىن جانە از زەرتتەلگەن الىس جاعى.

«چانە-6» بۇرعىلاۋ قوندىرعىسى مەن روبوتتاندىرىلعان ءشومىش قۇرىلعىسىنىڭ كومەگىمەن شامامەن 2 كيلوگرامم توپىراق جيناۋى ءتيىس. ۇلگىلەر ارنايى كونتەينەرلەرگە سالىنادى. مودۋل ونىمەن بىرگە اۋەلى وربيتالىق اپپاراتقا، سودان كەيىن جەرگە ورالادى. اپپارات جەلتوقسان ايىنىڭ ورتاسىندا قىتايدىڭ سولتۇستىگىندەگى ىشكى موڭعوليا ايماعىنا قونادى دەپ شامالانىپ وتىر.

ق ح ر بۇل ميسسيانى فرانسيا، يتاليا جانە ەۋروپالىق عارىش اگەنتتىگىمەن، سونداي-اق «چانە-6» ءۇشىن ءوز جابدىقتارىن ۇسىنعان شۆەتسيامەن بىرلەسىپ جۇرگىزەدى.

سونداي-اق ونىڭ بورتىندا پاكىستاندىق شاعىن جەرسەرىگى بار.

سوڭعى جاڭالىقتار