قىتاي اۆتوكولىك قاۋىپسىزدىگىنە قويىلاتىن تالاپتى قاتايتپاق

ق ح ر ونەركاسىپ جانە اقپاراتتاندىرۋ مينيسترلىگى مەن نارىقتى رەتتەۋ جونىندەگى مەملەكەتتىك باسقارمانىڭ باسشىلىعىمەن ءتورت ۆەدومستۆو ازىرلەگەن قۇجات جوباسىنا سايكەس، اۆتووندىرۋشىلەرگە كولىك مودەلدەرىن سەرتيفيكاتتاۋ جانە ولاردى مەملەكەتتىك كاتالوگقا ەنگىزۋ بويىنشا جاڭا تالاپتار قويىلادى.

مەملەكەتتىك ورگان وكىلدەرى تەحنولوگيالىق يننوۆاتسيالاردىڭ جىلدام دامۋى جانە جاڭا ونىمدەردى نارىققا شىعارۋداعى اسىعىستىق سالدارىنان كولىكتەر جەتكىلىكتى دەڭگەيدە سىناقتان وتپەي جاتقانىن، بۇل تۇتىنۋشىلار مەن قورشاعان ورتا ءۇشىن جاسىرىن تاۋەكەلدەر تۋدىراتىنىن اتاپ ءوتتى.

2027-جىلدىڭ 1-قاڭتارىنان باستاپ اۆتووندىرۋشىلەر يننوۆاتسيالىق جۇيەلەردىڭ، اتاپ ايتقاندا، باعدارلامالىق جانە اپپاراتتىق شەشىمدەردىڭ كەڭەيتىلگەن پارامەترلەرىن، سونداي-اق ولاردى سەنىمدىلىگى، قورشاعان ورتاعا بەيىمدەلۋى جانە بەرىكتىگى بويىنشا ەگجەي-تەگجەيلى سىناقتان وتكىزۋ تۋرالى ەسەپتەرىن ۇسىنۋعا مىندەتتەلەدى.

قازىر ساتىلىپ جاتقان مودەلدەردىڭ جوعارىدا اتالعان تالاپتار بويىنشا قوسىمشا قاۋىپسىزدىك دەرەكتەرىن ۇسىنۋ ءۇشىن اۆتووندىرۋشىلەرگە 2027-جىلدىڭ 1-شىلدەسىنە دەيىن مەرزىم بەرىلەدى. ەگەر سىناق كەزىندە قۇرىلىمدىق اقاۋلار انىقتالسا، كومپانيالار ءوندىرىستى دەرەۋ توقتاتىپ، ساتىلىمعا شىعارىلعان كولىكتەردى كەرى قايتارۋى قاجەت.

اۆتوموبيل كومپانيالارىنا بۇدان بىلاي جۇرگىزۋشىگە كومەك كورسەتۋ جۇيەلەرى مەن اۆتوپيلوت مۇمكىندىكتەرىنىڭ جالعان نەمەسە اسىرە جارنامالاۋعا، جول ەرەجەسى بۇزىلعان جارنامالاردى پايدالانۋعا تىيىم سالىنادى. ساتىپ الۋشىعا تەحنولوگيالاردىڭ شەكتەۋلەرى تۋرالى ناقتى اقپارات بەرىلۋى ءتيىس.

بيلىك كۇتپەگەن ۋاقىتتا زاۋىتتاردى تەكسەرۋدى كۇشەيتپەك. سونداي-اق كراش-تەستىلەردى بەينەگە ءتۇسىرۋدى پىسىقتاۋ تالاپتارى قويىلىپ، جالعان ەسەپتەردى ۇسىنعان كومپانيالارعا قاتاڭ سانكسيالار تاعايىندالادى، ءتىپتى ولار ساۋدا ليتسەنزيالارىنان ءبىرجولاتا ايىرىلۋى دا مۇمكىن.

قۇجات جوباسى جونىنەن قوعامدىق تالقىلاۋ 2026-جىلدىڭ 10-قاراشاسىنا دەيىن جالعاسادى.

بۇعان دەيىن قىتاي اۆتوموبيل كومپانيالارىنا باعانى سايكەستەندىرۋ تالابىن قويعان بولاتىن.

گەرمانيانىڭ اۆتوكولىك ونەركاسىبى باسەكەدەگى ورنىن جوعالتىپ جاتىر.