قىتاي اسكەرى العاش رەت اۆتومات ارقالاعان روبوت ءيتىن كورسەتتى
بەيجىڭ. KAZINFORM - «التىن ايداھار-2024» تاقىرىبىمەن وتكەن بۇل اسكەري وقۋ-جاتتىعۋدا قىتاي ارمياسى روبوت ءيتىن كورسەتىپ، ەل نازارىن وزىنە اۋداردى.
قىتاي مەن كامبودجا اسكەريلەرى 15 كۇندىك بىرلەسكەن اسكەري جاتتىعۋ وتكىزىپ جاتىر.
قىتايدىڭ رەسمي باسىلىمى Global Times حابارلاۋىنشا، «التىن ايداھار-2024» كود اتاۋىمەن اتالعان شارا - ەكى ەل اراسىندا بۇرىن-سوڭدى وتكىزىلگەن ەڭ ءىرى اسكەري جاتتىعۋ.
وعان قاتىسۋ ءۇشىن قىتاي اسكەرى 760، كامبودجا 1315 ادام جىبەردى.
سونىمەن قاتار، بۇل اسكەري جاتتىعۋعا قىتايدىڭ 3 اسكەري كەمەسى، 11 كامبودجا اسكەري كەمەسى، 2 تىكۇشاعى جانە 69 جاۋىنگەرلىك تەحنيكاسى قاتىستى.
قىتاي اسكەريلەرى وقۋ-جاتتىعۋ بارىسىندا قارۋلى روبوت يتتەردى كورسەتتى. بۇل - ارقاسىنا اۆتوماتتى ۆينتوۆكا ورناتىلعان قاشىقتان باسقارىلاتىن ءتورتاياقتى روبوت.
بۇل - قىتاي ارمياسىنىڭ اسكەري روبوت يتتەرىن العاش رەت كوپشىلىككە كورسەتۋى.
قىتاي ارمياسى پايدالاناتىن روبوت- يتتەر نەگىزىنەن ەكى تۇرگە بولىنەتىنىن كوپشىلىككە تاراعان ۆيدەوكونتەنتتەن كورۋگە بولادى: ءبىرى بارلاۋ ءۇشىن پايدالانىلاتىن روبوت يت، ەكىنشىسى - ارقاسىنا اۆتوماتتى ۆينتوۆكا ورناتىلعان جاۋىنگەرلىك روبوت يت، ول نەگىزىنەن ۇيلەردەگى نىسانالاردى ىزدەستىرۋ جانە شابۋىلعا قولدانىلادى.
قىتايلىق اسكەريلەر مۇنداي روبوت يت جاسىرىن جەردەن جاۋ نىساندارىنا شابۋىل جاساي الادى، بۇل اسكەريلەردىڭ سوققى بەرۋ قابىلەتىن جاقسارتادى جانە ءوز شىعىنىن ازايتادى دەپ مالىمدەدى.
كامبودجا مەن قىتاي اسكەرلەرىنىڭ بىرلەسكەن وقۋ-جاتتىعۋى 16-مامىردا باستالعان.
انتيتەررورلىق جانە گۋمانيتارلىق كومەك كورسەتۋ ماقساتىندا وتكىزىلەتىن شارا 30 -مامىردا اياقتالادى.
بۇل اسكەري جاتتىعۋدىڭ بارلىق شىعىنىن قىتاي ءوز موينىنا الادى.
