قىتاي مارستان اكەلىنەتىن توپىراقتى زەرتتەيتىن ارنايى زەرتحانا تۇرعىزادى
استانا. KAZINFORM - قىتاي مارستان توپىراق ۇلگىسىن جەرگە جەتكىزۋ ميسسياسىنا دايىندىق اياسىندا پلانەتالىق قورعانىس زەرتحاناسىن سالۋدى جوسپارلاپ وتىر، دەپ حابارلايدى Xinhua.
نىسان انحوي پروۆينتسياسىنىڭ حەفەي قالاسىنداعى تەرەڭ عارىشتى زەرتتەۋ عىلىمي-تەحنولوگيالىق قالاشىعىنىڭ ءبىرىنشى كەزەڭى اۋماعىندا بوي كوتەرەدى. زەرتحانانى پايدالانۋ جۇمىستارىنىڭ ءبىر بولىگىن تەرەڭ عارىشتى زەرتتەۋ زەرتحاناسى (DSEL) اتقارادى.
زەرتحانادا مارستان جەتكىزىلەتىن ۇلگىلەردىڭ دە، جەر بيوسفەراسىنىڭ دا قاۋىپسىزدىگىن قامتاماسىز ەتەتىن ەكىجاقتى قورعانىس جۇيەسى ەنگىزىلەدى.
ونىڭ نەگىزگى مىندەتتەرىنە ۇلگىلەردى زارارسىزداندىرۋ، كونتەينەرلەردى اشۋ، توپىراقتى وڭدەۋ جانە بيولوگيالىق قاۋىپ-قاتەردى باعالاۋ كىرەدى.
DSEL ءدىڭ دامۋ ستراتەگياسى دەپارتامەنتىنىڭ ديرەكتورى لي حاننىڭ ايتۋىنشا، قىتاي جەردەگى ميكرواعزالاردىڭ مارسقا تارالۋىنا جول بەرمەۋ جانە جەردى ىقتيمال عالامشاردان تىس تىرشىلىك نىساندارىنان قورعاۋ ماقساتىندا عارىشتىق زەرتتەۋلەر جونىندەگى كوميتەتتىڭ پلانەتالىق قورعانىس قاعيدالارىن ساقتايدى.
«تيانۆەن-3» ميسسياسى اياسىنداعى عارىش اپپاراتىن ۇشىرۋ شامامەن 2028-جىلعا جوسپارلانعان. ال مارس توپىراعىنىڭ ۇلگىلەرىن جيناپ، جەرگە جەتكىزۋ 2031-جىلى جۇزەگە اسادى دەپ كۇتىلۋدە.
بۇعان دەيىن قىتايدىڭ مارسقا ارنالعان ميسسياعا قاتىساتىن حالىقارالىق سەرىكتەستەردى ىرىكتەۋدى اياقتاعانى حابارلانعان بولاتىن.
