قىتاي اۋەجايىندا ەسىرتكىنى اعزاسىنا جاسىرعان جولاۋشى ۇستالدى

استانا. KAZINFORM - قىتاي اۋەجايىندا شەتەلدىك ازامات ەسىرتكىنى اعزاسىنا جاسىرىپ، كەدەننەن وتپەك بولدى، دەپ حابارلايدى CNS اقپارات اگەنتتىگى.

قىتاي استاناسى بەيجىڭدەگى اۋەجاي كەدەنشىلەرى ەسىرتكىنى اعزاسىنا جاسىرىپ، زاڭسىز تاسىمالداعان شەتەلدىك ازاماتتى ۇستادى. قىلمىسكەردەن 123 دانا كاپسۋلا تاركىلەنىپ، ولاردىڭ جالپى سالماعى 1,58 كەلىدەن استى. بۇل سوڭعى بەس جىلدا انىقتالعان ەڭ ۇلكەن ەسىرتكى تاسىمالى بولىپ تۇر.

اۋەجايدا رەيس جولاۋشىلارىن تەكسەرۋ كەزىندە كۇدىكتى ەر ادامنىڭ كەدەن دەكلاراتسياسىنا ەشقانداي جۇك تۋرالى مالىمەت بەرمەگەنى جانە ونىڭ مازاسىز ارەكەتتەرى قىزمەتكەرلەردىڭ نازارىن اۋداردى.

سۇراق- جاۋاپ پەن تەكسەرۋ ناتيجەسىندە ونىڭ ىشىنە ەسىرتكى جاسىرعانى انىقتالدى. ول دەرەۋ تەكسەرۋ قىزمەتىنە جەتكىزىلىپ، دارىگەرلىك باقىلاۋعا الىندى. كەيىن ول بىرنەشە رەت اعزاسىنان ەسىرتكى كاپسۋلالارىن شىعاردى. ساراپتاما بۇل كاپسۋلالاردىڭ ىشىندە جوعارى ساپالى كوكاين بار ەكەنىن راستادى.

ادام اعزاسىندا ەسىرتكى تاسىمالداۋ - قىلمىسكەرلەر ءجيى قولداناتىن قاۋىپتى ءادىس. ەسىرتكى كاپسۋلالارى اسقازان قىشقىلىنان زاقىمدانىپ، جارىلسا، ادام اعزاسىنا ۋلى زات تاراپ، ولىمگە دەيىن اكەلۋى مۇمكىن.

قىتاي زاڭدارى ەسىرتكى تاسىمالىنا قاتاڭ قارايدى. زاڭ بويىنشا ەسىرتكى تاسىمالداۋ نەمەسە ساتۋمەن اينالىسقان ادام كەز كەلگەن جاعدايدا قىلمىستىق جاۋاپقا تارتىلادى. كۇدىكتىلەر ۇزاق مەرزىمگە باس بوستاندىعىنان ايىرىلىپ، ءتىپتى ءولىم جازاسىنا كەسىلۋى مۇمكىن.

بۇعان دەيىن قىتايدىڭ قورعانىس ءمينيسترى سىبايلاس جەمقورلىققا قاتىسى بار دەگەن كۇدىككە ىلىنگەنى بەلگىلى بولدى.

اۆتور
دانا نۇرباقىت