قىتاي ماماندىقتار ءتىزىمىن بولاشاقتىڭ تالابىنا ساي جاڭارتتى
استانا. KAZINFORM – ق ح ر-دا ەڭبەك نارىعىنداعى كەيىنگى وزگەرىستەردى كورسەتەتىن ماماندىقتاردىڭ جاڭارتىلعان ءتىزىمى تانىستىرىلدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى Xinhua عا سىلتەمە جاساپ.
قحر ادام رەسۋرستارى جانە الەۋمەتتىك قامسىزداندىرۋ مينيسترلىگى ءبىرقاتار مەملەكەتتىك ورگاندارمەن بىرلەسىپ، 11 جاڭا ماماندىق پەن جۇمىستىڭ 23 تۇرىنەن تۇراتىن ءتىزىمدى جاريالادى. بۇل - 2019 -جىلدان بەرگى سەگىزىنشى جاڭارتۋ.
تومەن اۋە كەڭىستىگىندەگى ەكونوميكا سالاسىندا دروندار توبىنىڭ ۇشۋىن جوسپارلاۋشىلار، دروندارمەن جۇك تاسىمالداۋ ماماندارى جانە دروندار مەن شاعىن ۇشۋ اپپاراتتارىنىڭ ينتەللەكتۋالدى بايلانىس جۇيەلەرىن باسقارۋشىلار پايدا بولدى.
سيفرلىق ەكونوميكا سالاسىنا ج ي جونىندەگى ينجەنەر-تەحنيك ماماندار جانە شاعىن ەلەكتر جەلىلەرىن باسقارۋشىلار قوسىلدى.
سالا ساراپشىلارى بۇل جاڭارتۋلاردى ەڭبەك نارىعىنىڭ «بارومەترى» سانايدى، ويتكەنى ولار قىتايداعى ونەركاسىپتىك تۇلەۋدىڭ قارقىنىن ايقىن كورسەتىپ تۇر.
- جاڭا كاسىپتەردىڭ پايدا بولۋى - تەحنولوگيالاردى قولدانۋدىڭ جاڭا باعىتتارىنا، نارىقتاعى تىڭ وزگەرىستەر مەن تۇتىنۋشىلاردىڭ جاڭا سۇرانىستارىنا بەرىلگەن تىكەلەي جاۋاپ، - دەدى حالىقارالىق بيزنەس جانە ەكونوميكا ۋنيۆەرسيتەتى جانىنداعى قىتاي اشىق ەكونوميكاسىن زەرتتەۋ اكادەمياسىنىڭ عىلىمي قىزمەتكەرى لي چانان.
Zhaopin ونلاين- جۇمىسقا ورنالاستىرۋ پلاتفورماسىنىڭ ۆيتسە-پرەزيدەنتى لي چياننىڭ ايتۋىنشا، جاڭا ماماندىقتاردىڭ پايدا بولۋى قىتاي ونەركاسىپ جۇيەسىنىڭ جوعارى تەحنولوگيالى، اقىلدى جانە ەكولوگيالىق تازا باعىتقا بەت بۇرىپ كەلە جاتقانىن اڭعارتادى.
بۇعان دەيىن قىتايدىڭ جوعارى وقۋ ورىندارىندا ج ي سۇرانىس وتە جوعارى ماماندىقتاردىڭ بىرىنە اينالعانىن حابارلانعانبىز.
