قىتاي ا ت ە س سامميتىن وتكىزۋگە دايىندالىپ جاتىر
استانا. قازاقپارات - 18-19-قاراشا كۇندەرى قىتاي وڭتۇستىگىندەگى شىنجىن قالاسىندا ازيا-تىنىق مۇحيتى ەكونوميكالىق ىنتىماقتاستىعى فورۋمى كوشباسشىلارىنىڭ 33-بەيرەسمي كەزدەسۋى وتەدى، دەپ حابارلايدى Kazinform اگەنتتىگىنىڭ بەيجىڭدەگى مەنشىكتى ءتىلشىسى.
ءىس-شارا «بىرلەسە وركەندەۋ ءۇشىن ازيا-تىنىق مۇحيتى قاۋىمداستىعىن قۇرۋ» تاقىرىبىندا وتەدى. فورۋمنىڭ اشىلۋ راسىمىندە قىتاي ءتوراعاسى شي جينپيڭ ءسوز سويلەيدى.
كەشە قىتاي سىرتقى ىستەر مينيسترلىگىنىڭ رەسمي وكىلى ماو نين قىتاي، رەسەي جانە ا ق ش كوشباسشىلارىنىڭ العاشقى جۇزبە-ءجۇز كەزدەسۋى ازيا-تىنىق مۇحيتى ەكونوميكالىق ىنتىماقتاستىعى فورۋمىنىڭ سامميتى اياسىندا وتەتىنىن، وندا تاراپتار جاھاندىق بەيبىتشىلىكتى ساقتاۋ جانە الپاۋىت ەلدەر قارىم-قاتىناستارىنداعى ستراتەگيالىق تۇراقتىلىقتى نىعايتۋ بويىنشا تەرەڭ پىكىر الىساتىنىن حابارلادى.
نەگىزگى سامميت قارساڭىندا، سەيسەنبىدە شي جينپيڭ كانادا، پاپۋا-جاڭا گۆينەيا، ۆەتنام، مەكسيكا، پەرۋ جانە چيلي كوشباسشىلارىمەن ءبىرقاتار ەكىجاقتى كەلىسسوزدەر جۇرگىزدى.
سونداي-اق شىنجىندەگى شيڭحاي حالىقارالىق كونفەرەنسيا ورتالىعىندا ەكى كۇندىك ازيا-تىنىق مۇحيتى ەكونوميكالىق ىنتىماقتاستىعى فورۋمىنىڭ ىسكەرلىك سامميتى باستالدى. وعان فورۋمعا مۇشە 21 ەكونوميكانىڭ جانە ۇلى بريتانيا، فرانسيا، گەرمانيا جانە شۆەيتساريا سەكىلدى فورۋمعا كىرمەيتىن 13 ەلدىڭ 2000 نان استام ساياسي جانە بيزنەس وكىلدەرى قاتىسىپ جاتىر.
شىنجىن - قىتايدىڭ نەگىزگى تەحنولوگيالىق ورتالىقتارىنىڭ ءبىرى. قالادا Huawei ،Tencent ،BYD جانە DJI سياقتى كومپانيالاردىڭ شتاب-پاتەرى ورنالاسقان. مەگاپوليس جۇرگىزۋشىسىز تاكسي، درونمەن جەتكىزۋ جانە اۆتوماتتاندىرىلعان تۇراقتاردى جاپپاي قولدانىسقا ەنگىزىپ كەلەدى. 2019-جىلى قالدىق تۇرمىستىق قالدىقتاردى كومۋدى تولىعىمەن توقتاتىپ، ورتەۋگە كوشكەن قىتايدىڭ العاشقى قالاسى اتاندى.
ەسكە سالا كەتەيىك، بۇعان دەيىن ترامپتىڭ ازياعا ساپارى باستالعانىن حابارلاعان ەدىك.
سونداي-اق قىتاي س ءى م شي جينپيڭ، پۋتين جانە ترامپتىڭ 19-قاراشادا كەزدەسەتىنىن راستادى.