قىتاي ا ق ش-تى تايۆان ماسەلەسىنە ساقتىقپەن قاراۋعا شاقىردى
استانا. KAZINFORM - قىتاي سىرتقى ىستەر مينيسترلىگى ا ق ش-تى «ءبىر قىتاي» قاعيداتىن قاتاڭ ساقتاۋعا جانە تايۆان ماسەلەسىنە ساقتىقپەن قاراۋعا شاقىردى، دەپ حابارلايدى شينحۋا.
بۇل تۋرالى قىتاي س ءى م- ءنىڭ رەسمي وكىلى ماو نين 12-قازاندا وتكەن كەزەكتى باسپاءسوز ءماسليحاتىندا مالىمدەدى.
ونىڭ ايتۋىنشا، ۆاشينگتون «ءبىر قىتاي» قاعيداتىن جانە قىتاي مەن ا ق ش اراسىنداعى ءۇش بىرلەسكەن كومميۋنيكەنىڭ ەرەجەلەرىن ساقتاپ، ەكى ەل اراسىنداعى قارىم-قاتىناستاردىڭ تۇراقتىلىعىن، سونداي-اق ايماقتاعى بەيبىتشىلىك پەن قاۋىپسىزدىكتى قامتاماسىز ەتۋگە ناقتى ۇلەس قوسۋى ءتيىس.
قىتاي ديپلوماتى بۇل مالىمدەمەنى ا ق ش مەملەكەتتىك دەپارتامەنتىنىڭ وتكەن اپتادا تايۆاننىڭ شىعىس جاعالاۋىنداعى قىتايدىڭ تەڭىز قىزمەتىن «ايماقتىق تۇراقتىلىققا نۇقسان كەلتىرەدى» دەپ باعالاۋىنا جاۋاپ رەتىندە جاسادى.
- قىتاي بۇل ماسەلەگە قاتىستى ءوز ۇستانىمىن بىرنەشە رەت ناقتى ءتۇسىندىردى. تايۆان ارالىنىڭ شىعىسىنداعى تەڭىز ايدىنىندا قىتايدىڭ ايرىقشا ەكونوميكالىق ايماعى مەن قۇرلىقتىق قايراڭى بار. سوندىقتان اتالعان سۋلارداعى قىزمەتىمىز ەگەمەندىك قۇقىقتارىمىز بەن زاڭنامامىز اياسىندا جۇزەگە اسىرىلادى. بۇل زاڭدى ارەكەت جانە ونى سىناۋعا نەگىز جوق،- دەدى ماو نين.
ول قىتايدىڭ اتالعان ايماقتا شيەلەنىس تۋدىرۋعا نەمەسە تۇراقتىلىقتى بۇزۋعا باعىتتالعان ارەكەتتەر جاساماعانىن مالىمدەدى.
- قىتاي تاراپى ەشقاشان بۇل ايماقتا ارانداتۋشىلىق جاساپ، تۇراقتىلىققا نۇقسان كەلتىرگەن تاراپ بولعان ەمەس. تايۆان ماسەلەسى - قىتايدىڭ ىشكى ءىسى جانە وعان قانداي دا ءبىر سىرتقى ارالاسۋعا جول بەرىلمەيدى،-دەپ اتاپ ءوتتى س ءى م وكىلى.
ايتا كەتەيىك، بۇعان دەيىن قىتاي ا ق ش مەملەكەتتىك دەپارتامەنتىنىڭ سايتىنداعى تايۆانعا قاتىستى مالىمەتتى وزگەرتۋىن سىنعا الىپ، ۆاشينگتوندى «ءبىر قىتاي» قاعيداتى مەن ەكى ەل اراسىنداعى ءۇش بىرلەسكەن كومميۋنيكەنى ساقتاۋعا شاقىرعان بولاتىن.
