قىتاي ا ق ش تاۋارلارىنا 50 پايىز قوسىمشا باج سالىعىن ەنگىزدى
استانا. KAZINFORM – ا ق ش- تىڭ قىتايدان جەتكىزىلەتىن تاۋارلارعا سالىناتىن قوسىمشا باج سالىعىنىڭ مولشەرلەمەسىن 104 پايىزعا جەتكىزۋ تۋرالى شەشىمى 9-ءساۋىر كۇنى تۇستە كۇشىنە ەنگەننەن كەيىن، قىتاي بيلىگى قارىمتا شارا قابىلدادى. بۇل تۋرالى Lianhe Zaobao باسىلىمى حابارلادى.
اتاپ ايتقاندا، 10-ءساۋىر كۇنى 12:01 دەن باستاپ ا ق ش- تان اكەلىنەتىن بارلىق تاۋارعا تاعى دا 50 پايىز قوسىمشا باج سالىعى ەنگىزىلەدى. وسىلايشا، قىتايدىڭ ا ق ش تاۋارلارىنا ەنگىزگەن باج سالىعىنىڭ جالپى كولەمى 84 پايىزعا دەيىن ۇلعايادى.
قىتاي مەملەكەتتىك كەڭەسىنىڭ جانىنداعى كەدەندىك تاريفتەر جونىندەگى كوميسسيا جاريالاعان رەسمي حابارلامادا ا ق ش ۇكىمەتىنىڭ 8-ساۋىردە قىتايدان جەتكىزىلەتىن تاۋارلارعا سالىناتىن «ءوزارا تاريفتەردىڭ» مولشەرىن 34 پايىزدان 84 پايىزعا دەيىن كوتەرگەنى قاداپ ايتىلدى. قۇجاتتا ا ق ش- تىڭ باج سالىعىن ارتتىرۋى «قايتالانعان قاتەلىك» دەپ سيپاتتالىپ، بۇل ارەكەت «قىتايدىڭ زاڭدى مۇددەسىن تابانعا تاپتاپ، ەرەجەگە نەگىزدەلگەن كوپجاقتى ساۋدا جۇيەسىنە ەلەۋلى زيان كەلتىردى» دەپ اتاپ كورسەتىلدى.
حابارلاما ايتىلۋىنشا، قىتاي مەملەكەتتىك كەڭەسىنىڭ بەكىتۋىمەن، 10-ءساۋىر كۇنى ساعات 12:01 دەن باستاپ ا ق ش- تان اكەلىنەتىن يمپورتتىق تاۋارلارعا سالىناتىن قوسىمشا باج سالىعىنىڭ مولشەرلەمەسى قايتا قارالىپ، 34 پايىزدان 84 پايىزعا وسىرىلەدى.
ەسكە سالا كەتەيىك، بۇعان دەيىن ا ق ش- تىڭ قىتايعا قارسى 104 پايىز كولەمىندە باج سالىعىن قولدانىسقا ەنگىزۋىنە بايلانىستى قىتاي سىرتقى ىستەر مينيسترلىگى رەسمي بەيجىڭنىڭ ءوز مۇددەسىن قورعاۋ ءۇشىن باتىل ءارى پارمەندى شارالار قولدانۋدى جالعاستىراتىنىن مالىمدەگەنىن جازعان بولاتىنبىز.
