قىتاي 1 تريلليون يۋان ارنايى مەملەكەتتىك وبليگاتسيالار شىعارادى
بەيجىڭ. KAZINFORM - قىتاي پرەمەر-ءمينيسترى لي تسيان 5- ناۋرىزدا وتكەن 14-بۇكىل قىتايلىق حالىق وكىلدەرى جينالىسىنىڭ ەكىنشى سەسسياسىندا ۇكىمەتتىڭ جىلدىق جۇمىسى تۋرالى ەسەپ بەردى.
لي تسيان ۇكىمەت جۇمىسىنىڭ ەسەبىندە ۇلتتىق دامۋداعى كەيبىر ءىرى جوبالاردى قارجىلاندىرۋ ماسەلەسىن جۇيەلى تۇردە شەشۋ ءۇشىن قىتاي ۇكىمەتى بيىلدان باستاپ الداعى جىلدارى بىرنەشە رەت قاتارىنان «اسا ۇزاقمەرزىمدى ارنايى مەملەكەتتىك وبليگاتسيالار» شىعارۋدى جوسپارلاپ وتىرعانىن ايتتى.
وسى ارنايى مەملەكەتتىك قارىزدى شىعارۋ ارقىلى الىنعان قاراجات تەك نەگىزگى ۇلتتىق ستراتەگيالاردى جۇزەگە اسىرۋعا جانە نەگىزگى سالالارداعى قاۋىپسىزدىك مۇمكىندىكتەرىن قۇرۋعا جۇمسالاتىنىن اتاپ ءوتتى. پرەمەر جاريالاعان ەسەپكە سايكەس، قىتاي ۇكىمەتى 2024-جىلى جالپى نومينالدى قۇنى 1 تريلليون يۋان بولاتىن «اسا ۇزاق مەرزىمدى ارنايى مەملەكەتتىك وبليگاتسيالار» شىعارادى.
«اسا ۇزاق مەرزىمدى ارنايى مەملەكەتتىك وبليگاتسيالار» دەگەنىمىز نە؟
قىتاي 1998، 2007 جانە 2020-جىلدارى ءۇش رەت «ارنايى مەملەكەتتىك وبليگاتسيالار» شىعارعان.
ال «اسا ۇزاق مەرزىمدى مەملەكەتتىك وبليگاتسيالاردى» (30 جىلدىق مەرزىم) شىعارۋى 2001-جىلى باستالىپ، 2016-جىلدان بەرى شىعارۋ كولەمى ارتىپ، 2020-جىلى 620 ميلليارد يۋانعا جەتكەن. «اسا ۇزاق مەرزىمدى ارنايى مەملەكەتتىك وبليگاتسيالار» وسى ەكى وبليگاتسيانىڭ ينتەگراتسيالانعان ءتۇرى بولادى.
قىتاي بۇقارالىق اقپارات قۇرالدارىنىڭ تۇسىندىرمەسى بويىنشا، «اسا ۇزاق مەرزىمدى ارنايى مەملەكەتتىك وبليگاتسيالار» دەپ اتالاتىن وبليگاتسيالاردىڭ شىعارىلۋ مەرزىمى 10 جىلدان استام ەكەنىن بىلدىرەدى. سونىمەن قاتار بۇل وبليگاتسيالاردان تۇسكەن قاراجات ارنايى جوبالارعا جۇمسالادى جانە ونى قىتايدىڭ قارجى مينيسترلىگى ورىندى دەپ تاپقان كەزدە شىعارادى.
جەرگىلىكتى ب ا ق مۇنداي ارنايى مەملەكەتتىك وبليگاتسيالاردى شىعارۋ ارقىلى قىتاي ۇكىمەتى اۋقىمدى ينفراقۇرىلىمدىق جوبالار مەن ۇلتتىق ۇزاق مەرزىمدى ستراتەگيالىق جوبالارىن جۇزەگە اسىرۋعا ءتيىمدى قولداۋ كورسەتۋ ءۇشىن بيۋجەتتەن تىس قاراجاتتى كوبىرەك تارتا الادى دەپ ەسەپتەيدى.
