قىستا كولىكتى جىلىتۋ كەزىندە قانداي قاۋىپسىزدىك ەرەجەلەرىن ساقتاۋ كەرەك

استانا. KAZINFORM - كۇن سۋىتقان كەزدە اۆتوكولىكتەردە ءورت شىعۋ قاۋپى ارتادى.

Атырау – Индер тасжолындағы апат: бір адам көз жұмып, көлік өртеніп кетті
Фото: видеодан алынған скрин

وسىعان بايلانىستى توتەنشە جاعدايلار مينيسترلىگى جۇرگىزۋشىلەرگە كولىكتى جىلىتۋ كەزىندە قاۋىپسىزدىك تالاپتارىن قاتاڭ ساقتاۋدى ەسكەرتتى.

مينيسترلىك مالىمەتىنشە، قىس مەزگىلىندە جۇرگىزۋشىلەر كولىكتەرىن ءجيى جىلىتادى. الايدا ەلەكتر سىمدارىنىڭ اقاۋى، جانارمايدىڭ اعۋى نەمەسە جىلىتۋ قۇرىلعىلارىن دۇرىس پايدالانباۋ ورتكە اكەلۋى مۇمكىن.

سوندىقتان توتەنشە جاعدايلاردىڭ الدىن الۋ ءۇشىن كولىكتىڭ تەحنيكالىق جاعدايىن ۇنەمى باقىلاپ، قاۋىپسىزدىك ەرەجەلەرىن ساقتاۋ قاجەت.

- ەلەكتر سىمدارىنىڭ، اككۋمۋلياتوردىڭ جانە جانارماي جۇيەسىنىڭ جارامدىلىعىن ۇنەمى تەكسەرىڭىز. قوزعالتقىشى قوسۋلى تۇرعان كولىكتى قاراۋسىز قالدىرماڭىز. كولىكتى جىلىتۋ ءۇشىن اشىق وتتى جانە قولدان جاسالعان قۇرىلعىلاردى پايدالانباڭىز. ءتيىستى جەلدەتۋ جۇيەسى جوق جابىق گاراجدا كولىكتى جىلىتپاڭىز،- دەلىنگەن مينيسترلىك حابارلاماسىندا.

سونىمەن قاتار ت ج م ماماندارى جۇرگىزۋشىلەرگە كولىكتە جارامدى ءورت سوندىرگىش ۇستاپ، ونى قولدانۋ ءتارتىبىن الدىن الا مەڭگەرۋگە كەڭەس بەرەدى.

قوزعالتقىش بولىگىندە جانعىش ماتەريالداردىڭ جينالۋىنا جول بەرمەۋ جانە اۆتوكولىككە ۋاقىتىلى تەحنيكالىق قىزمەت كورسەتۋ دە ماڭىزدى.

ەگەر كولىكتەن كۇيىك ءيىسى شىعىپ، ءتۇتىن نەمەسە ءورت بەلگىلەرى بايقالسا، جۇرگىزۋشى دەرەۋ كولىكتى توقتاتىپ، قوزعالتقىشتى ءوشىرۋى كەرەك. ودان كەيىن سالوننان شىعىپ، 101 نەمەسە 112 نومىرىنە حابارلاسۋ قاجەت.

ۆەدومستۆو ءورت قاۋىپسىزدىگى ەرەجەلەرىن ساقتاۋ ازاماتتاردىڭ ءومىرى مەن مۇلكىن قورعاۋعا كومەكتەسەتىنىن ەسكە سالدى.

ايتا كەتەيىك، بۇعان دەيىن قازاقستاندا جىل باسىنان بەرى 373 اۆتوكولىك ورتەنگەنى حابارلانعان بولاتىن. ماماندار ءورتتىڭ نەگىزگى سەبەپتەرى رەتىندە ەلەكتر جۇيەسىندەگى اقاۋلاردى، جانارماي مەن مايدىڭ اعۋىن جانە قوزعالتقىش بولشەكتەرىنىڭ قىزىپ كەتۋىن اتاعان.