قىستا كولىكتىڭ بۇزىلۋىنا اكەلەتىن 9 ادەت
استانا. قازاقپارات - قىستا كولىك قۇرالىن پايدالانۋ قيىنعا سوعادى. كوپتەگەن جۇرگىزۋشى كولىكتى قاتتى زاقىمداۋى مۇمكىن قاتەلىكتەر جىبەرەدى. ساراپشى دميتري ماتۆەيەۆ كولىككە زيان تيگىزەتىن ادەتتەردى ءتىزىپ شىقتى، - دەپ حابارلايدى Vesti.kz.

1. اككۋمۋلياتوردىڭ كۇيىن ەلەمەۋ
قاتەلىك: قىستا كوپ ادام ەلەكتروليت دەڭگەيىن تەكسەرمەيدى.
كەڭەس: قاجەت بولسا، ەلەكتروليت قوسىڭىز نەمەسە تازارتىلعان سۋمەن سۇيىلتىڭىز. ەگەر ەلەكتروليتتە مەتالل قابىرشاقتارى تابىلسا، اككۋمۋلياتوردى اۋىستىرىڭىز، سەبەبى پلاستينالاردىڭ بۇزىلۋى ونىڭ ىستەن شىعۋىنا اكەلەدى.
2. كولىڭىزگە سايكەس كەلمەيتىن ماي قولدانۋ
قاتەلىك: 10W دەن جوعارى تۇتقىرلىعى بار مايدى پايدالانۋ.
كەڭەس: ءوندىرۋشى ۇسىنعان، قىس مەزگىلىنە سايكەس كەلەتىن مايدى قولدانىڭىز. بۇل قوزعالتقىشتىڭ ىسكە قوسىلۋىن جەڭىلدەتىپ، اككۋمۋلياتورعا تۇسەتىن جۇكتەمەنى ازايتادى.
3. سالقىنداتقىش سۇيىقتىقتى تەكسەرمەۋ
قاتەلىك: سالقىنداتقىش سۇيىقتىقتىڭ دەڭگەيى مەن كۇيىن باقىلاماۋ.
كەڭەس: سۇيىقتىقتىڭ تازا ەكەنىنە جانە ونىڭ دەڭگەيى ورتاشا مەن ماكسيمالدى بەلگى اراسىندا تۇرعانىنا كوز جەتكىزىڭىز. ەگەر سۇيىقتىق لايلانعان بولسا، ونى جاڭا توسول نەمەسە انتيفريزگە اۋىستىرىڭىز، اسىرەسە جازدا جۇيەگە سۋ قوسىلعان بولسا. سونىمەن قاتار شلانگىلەر مەن رەزەڭكە بولشەكتەردىڭ جاعدايىن تەكسەرىڭىز.
4. ءجۇرىس بولىگىنە نەمقۇرايلى قاراۋ
قاتەلىك: توزعان سايلەنتبلوكتار، ۆتۋلكالار جانە تۇراقتاندىرعىش تىرەكتەرىمەن ءجۇرۋ.
كەڭەس: سۋىق تۇسكەنگە دەيىن زاقىمدانعان بولشەكتەردى اۋىستىرىڭىز. اياز ءجۇرۋ بولىگىنىڭ توزۋىن ودان ءارى جىلدامداتادى.
5. توزعان شىنى تازالاعىش (دۆورنيك) شەتكالارى
قاتەلىك: قىس ماۋسىمى الدىندا شىنى تازالاعىش شەتكالارىن اۋىستىرماۋ.
كەڭەس: ايازعا ءتوزىمدى ماتەريالدان جاسالعان بەرىك قىسقى شەتكالاردى ورناتىڭىز. ولار سۋىقتا ءتيىمدى جۇمىس ىستەيدى جانە ۇزاق قىزمەت ەتەدى.
6. تەجەۋ جۇيەسىنە نەمقۇرايلى قاراۋ
قاتەلىك: تەجەۋ كولودكالارىنىڭ، ديسكىلەرىنىڭ جانە سۇيىقتىعىنىڭ جاعدايىن تەكسەرمەۋ.
كەڭەس: تەجەۋ جۇيەسىنىڭ دياگنوستيكاسىن ۇنەمى جۇرگىزىڭىز. قىسقى تايعاق جولداردا اقاۋلى تەجەگىشتەر اپاتقا اكەپ سوقتىرۋى مۇمكىن.
7. قۇلىپتار مەن تىعىزداعىشتاردى وڭدەمەۋ
قاتەلىك: سۋىتپايتىن سۇيىقتىقتار مەن سيليكون مايىن قولدانباۋ.
كەڭەس: قۇلىپتاردى، ەسىك، جۇكسالعىش، كاپوت جانە بەنزوباك قاقپاعىنىڭ تىعىزداعىشتارىن ارنايى قۇرالدارمەن وڭدەڭىز. بۇل ولاردىڭ قاتىپ قالۋىنىڭ الدىن الادى.
8. جىلۋ وقشاۋلاۋعا ءمان بەرمەۋ
قاتەلىك: قىسى قاتال ايماقتاردا كولىككە ارنالعان كورپە مەن رادياتور قورعانىسىن قولدانباۋ.
كەڭەس: قوزعالتقىشقا تۇسەتىن جۇكتەمەنى ازايتىپ، ونىڭ سالقىنداۋىنىڭ الدىن الۋ ءۇشىن قوسىمشا جىلۋ وقشاۋلاۋ قۇرالدارىن پايدالانىڭىز.
9. كورروزياعا قارسى وڭدەۋدى ەلەمەۋ
قاتەلىك: كولىكتىڭ كۋزوۆىن، اسىرەسە حيميالىق رەاگەنتتەر قولدانىلاتىن قالالاردا وڭدەمەۋ.
كەڭەس: قىس باستالماس بۇرىن كولىكتىڭ كورروزياعا قارسى قورعانىسىن جۇرگىزىڭىز. بۇل كۋزوۆتىڭ زاقىمدانۋىنان ساقتايدى جانە قىزمەت مەرزىمىن ۇزارتادى.
قورىتىندى
كولىكتى قىسقا دايىنداۋ - اقاۋلاردىڭ الدىن الىپ، ونىڭ قىزمەت ەتۋ مەرزىمىن ۇزارتۋدىڭ ماڭىزدى كەزەڭى. تەحنيكالىق قىزمەت كورسەتۋدى ۋاقىتىلى جۇرگىزۋ، توزعان بولشەكتەردى اۋىستىرۋ جانە دۇرىس ماتەريالداردى قولدانۋ قىسقى جولدا قاۋىپسىزدىك پەن جايلىلىقتى قامتاماسىز ەتەدى.
Massaget.kz