قىستا جولعا شىققاندا كولىكتە قانداي زاتتار بولۋ كەرەك
استانا. KAZINFORM - توتەنشە جاعدايلار مينيسترلىگى توتەنشە جاعدايلاردى جويۋ دەپارتامەنتىنىڭ باس مامانى ديدار قاجىكەنوۆ قىستا جولعا شىققاندا كولىكتە قانداي زاتتار بولۋ كەرەگىن ءتۇسىندىردى.
- قىستا جولعا شىقپاي تۇرىپ كولىكتىڭ تەحنيكالىق تۇرعىدا جارامدىلىعىن تەكسەرۋ كەرەك. مايىن اۋىستىرۋ سياقتى شارالاردىڭ ءبارىن كەز كەلگەن جۇرگىزۋشى ءبىلۋى كەرەك. ودان كەيىن ماشينەدە مىندەتتى تۇردە مايشام جانە باسقا دا جىلىتۋ قۇرالدارى بولۋ قاجەت. تۇرمىستىق جاعدايدا قولدانىلاتىن كەز كەلگەن جىلىتۋ قۇرالى جارامدى. ءبىرىنشى كەزەكتە ازىق-تۇلىك پەن اۋىزسۋ بولعانى دۇرىس، - دەدى ديدار قاجىكەنوۆ.
ت ج م مامانى جولعا شىقپاي تۇرىپ، اۋا رايى تۋرالى رەسمي مالىمەتتەردى ەسەپكە الۋدىڭ ماڭىزى زور ەكەنىن ەسكەرتتى.
- «112» نومىرىنەن كەلەتىن SMS حابارلامالار بار. ولاردى ەسكەرۋسىز قالدىرۋعا بولمايدى. «دارمەن» قوسىمشاسى بار. وسى قوسىمشا ارقىلى «قازاۆتوجولدىڭ» رەسمي سايتىنا كىرىپ، قاي جولدىڭ اشىق نەمەسە جابىق ەكەنىن كورۋگە بولادى. ال جولعا شىعىپ كەتكەن بولساڭىز، جول بويىنداعى جىلىتۋ پۋنكتتەرىنە جۇگىنگەن دۇرىس. سول ورىنداردا اۋا رايىنىڭ جاقسارعانىن كۇتۋ كەرەك، - دەدى ول.
ايتا كەتۋ كەرەك، كەيىنگى 5 كۇندە ت ج م وكىلدەرى جولدا قالعان 199 ادامدى قۇتقارىپ، 270 ادامدى جىلىتۋ بەكەتىنە اپارعان.
