قىسقى سپورت: ۇكىمەت باسشىسى مينيسترلەرگە ءبىرقاتار تاپسىرما بەردى
استانا. قازاقپارات - 2026-جىلعى قىسقى وليمپيادا ويىندارىنا ساپالى دايىندىق جۇمىستارىن كۇشەيتۋ كەرەك. بۇل تۋرالى ۇكىمەت وتىرىسىندا پرەمەر-مينيستر ولجاس بەكتەنوۆ ءمالىم ەتتى.

- ءبىزدىڭ ۇلتتىق قۇراما الداعى ازيا ويىندارىندا جاقسى ناتيجە كورسەتىپ، قازاقستاندىقتارعا ناعىز سپورت مەرەكەسىن سىيلايدى دەگەن ۇمىتتەمىز. ايگىلى سپورتشىلار - وليمپيادا جەڭىمپازدارى ۆلاديمير سميرنوۆتىڭ، ليۋدميلا پروكاشيەۆانىڭ، ەلەنا حرۋستاليەۆانىڭ، دەنيس تەننىڭ، يۋليا گالىشەۆانىڭ اتتارى قازاق سپورتىنىڭ تاريحىندا التىن ارىپتەرمەن جازىلعان.
سپورتشىلارىمىزدىڭ وسى داڭقتى جولدى حاربيندە وتەتىن الداعى ويىنداردا جالعاستىرىپ، جوعارى ناتيجە كورسەتۋلەرىنە تىلەكتەسپىن! تۋريزم جانە سپورت مينيسترلىگىنە، اكىمدىكتەرگە، بارلىق مۇددەلى ۇيىمدار مەن كومپانيالارعا قىتايدا ءساتتى ناتيجە كورسەتۋ ءۇشىن سپورتشىلارىمىزعا بارلىق جاعدايدى جاساۋدى تاپسىرامىن، - دەدى و. بەكتەنوۆ.
ۇكىمەت باسشىسى سىرتقى ىستەر مينيسترلىگى ۇلتتىق قۇراماعا ديپلوماتيالىق جەلى بويىنشا ءتيىستى قولداۋ كورسەتۋى قاجەت ەكەنىن ايتتى.
- مادەنيەت جانە اقپارات مينيسترلىگى سپورتشىلارىمىز قاتىساتىن ازيا ويىندارىنىڭ ۇزدىكسىز ءارى ساپالى ترانسلياتسياسىن قامتاماسىز ەتسىن. بارلىق سپورتتىق ءىس-شارالار بۇقارالىق اقپارات قۇرالدارى مەن الەۋمەتتىك جەلىلەردە كەڭىنەن جاريالانىپ وتىرۋعا ءتيىس. سونداي-اق تۋريزم جانە سپورت مينيسترلىگى اكىمدىكتەرمەن، ۇلتتىق وليمپيادا كوميتەتىمەن، فەدەراتسيالارمەن بىرلەسىپ، 2026-جىلعى قىسقى وليمپيادا ويىندارىنا ساپالى دايىندىق جۇمىستارىن بارىنشا كۇشەيتسىن، - دەدى پرەمەر-مينيستر.
بۇعان دەيىن ولجاس بەكتەنوۆ سپورتشىلاردى بالالار سەكسيالارىنان باستاپ وليمپيادالىق قۇراما كوماندالارعا دەيىن تاربيەلەۋدىڭ ناقتى جۇيە جوق ەكەنىن ايتىپ، سىنعا الدى.