قىسقى ماۋسىمدا جازعى دوڭعالاقپەن جۇرگەن جۇرگىزۋشىلەرگە قانشا ايىپپۇل سالىنادى
استانا. KAZINFORM - ەلىمىزدە رەسمي تۇردە كولىك جۇرگىزۋدىڭ قىسقى ماۋسىمى 1-جەلتوقساندا باستالادى. وسى ورايدا Kazinform دوڭعالاعىن ۋاقتىلى اۋىستىرماعان جۇرگىزۋشىلەرگە زاڭ بويىنشا قانشا ايىپپۇل سالىناتىنىن انىقتاپ كوردى.
ىشكى ىستەر مينيسترلىگىنىڭ باسپا ءسوز قىزمەتى ۇسىنعان رەسمي مالىمەتتەرگە ساي، M1 جانە N1 ساناتتاعى اۆتوموبيلدەر جازعى كەزەڭدە (ماۋسىم، شىلدە، تامىز) قارعا قارسى شينالارمەن جابدىقتالعان بولسا، ال قىس مەزگىلىندە (جەلتوقسان، قاڭتار، اقپان) قىسقى شينالار ورناتىلماعان بولسا، كولىكتى پايدالانۋعا تىيىم سالىنادى.
«بۇل شەكتەۋلەر سايكەسىنشە كەدەن وداعىنىڭ «دوڭعالاقتى كولىك قۇرالدارىنىڭ قاۋىپسىزدىگى تۋرالى» تەحنيكالىق رەگلامەنتىنىڭ 5.5-تارماعىمەن (كەدەن وداعى كوميسسياسىنىڭ 2011 -جىلعى 9-جەلتوقسانداعى №877 بەكىتىلگەن شەشىمى) جانە وسى قوسىمشانىڭ 5.6.3-تارماعىمەن رەتتەلەدى.
جوعارىداعى تەحنيكالىق رەگلامەنتتىڭ 5.5-تارماعى بويىنشا ەرەجە بۇزعانى ءۇشىن اقبتك 590-بابىنىڭ 5-بولىگىمەن اكىمشىلىك جاۋاپكەرشىلىك كوزدەلگەن، ياعني بەس ايلىق ەسەپتىك كورسەتكىش مولشەرىندە ايىپپۇل سالۋعا اكەپ سوعادى» دەلىنگەن ءى ءى م حابارلاماسىندا.
2024 -جىلى بۇل ايىپپۇل سوماسى - 18460 تەڭگە.
بۇل جەردە اتاپ وتەرلىگى، M1 ساناتىنا جەڭىل اۆتوموبيلدەر جاتادى، ولار جولاۋشى تاسىمالداۋعا ارنالعان جانە جۇرگىزۋشىنىڭ ورنىنان بولەك تاعى سەگىز ورىندىققا دەيىن بولادى.
ال، N1 ساناتىنا جۇك اۆتوموبيلدەرى جانە ولاردىڭ ءشاسسيى، ياعني جۇك تاسىمالداۋعا ارنالعان جانە ەڭ جوعارى سالماعى 3,5 توننادان اسپايتىن كولىك جاتادى.
«ش» بەلگىسى ەرىكتى تۇردە تاعىلادى
ەلىمىزدە 2016 -جىلى شەگەسى بار قىسقى دوڭعالاق ورناتىلعان كولىككە «ش» تانۋ بەلگىسىن تاعۋ مىندەتتەلگەن بولاتىن. بۇل وزگەرىس كوپ ۇزاماي نارىقتا «ش» تانۋ بەلگىسىن ساتۋعا قاتىستى دۇربەلەڭ تۋدىرىپ، قوعامنىڭ نارازىلىعىنا ۇشىرادى. كەلەسى جىلى ارنايى ۇكىمەت قاۋلىسى شىعىپ، جول قوزعالىسىنا قاتىستى زاڭعا وزگەرىستەر ەنگىزىلىپ، بۇل تالاپ الىنىپ تاستالعان ەدى.
«كولىك قۇرالدارىن پايدالانۋعا جىبەرۋ جونىندەگى نەگىزگى ەرەجەلەردىڭ 9-تارماعىنا سايكەس (قازاقستان رەسپۋبليكاسى ۇكىمەتىنىڭ 2014 -جىلعى 13-قاراشاداعى №1196-قاۋلىسىمەن بەكىتىلگەن) شينالارى بار مەحانيكالىق كولىك قۇرالىنىڭ ارتىندا «ش» تانۋ بەلگىسى جۇرگىزۋشىنىڭ قالاۋى بويىنشا ورناتىلادى. وسى تارماق بويىنشا اكىمشىلىك قۇقىق بۇزۋشىلىق تۋرالى كودەكسىندە (بۇدان ءارى - ا ق ب ت ك) اكىمشىلىك جاۋاپكەرشىلىك كوزدەلمەگەن»، - دەپ حابارلايدى ق ر ءى ءى م باسپا ءسوز قىزمەتى.
سونداي-اق، ۆەدومستۆو بيىل جىل باسىنان بەرى ا ق ب ت ك 590-بابى 5-بولىگى بويىنشا 162 مىڭنان استام اكىمشىلىك حاتتاما تولتىرىلعانىن مالىمدەدى.
ايتا كەتەيىك، سوڭعى كۇندەرى ەلىمىزدىڭ سولتۇستىك وبلىستارىندا تولاسسىز قار جاۋىپ، جول قوزعالىسىن قيىنداتتى. وتكەن دەمالىس كۇندەرى استانادا 200-دەن استام كولىك وقيعاسى تىركەلدى.
اۆتور
ەربول جانات
