قىسقى جاس وسپىرىمدەر وليمپياداسىندا ەل نامىسىن 42 سپورتشى قورعايدى
قازاقستاندىق سپورتشىلار 2024-جىلدىڭ 19- قاڭتارى مەن 1- اقپانى ارالىعىندا وڭتۇستىك كورەيانىڭ كانۆون قالاسىندا وتەتىن IV قىسقى جاس وسپىرىمدەر وليمپياداسىنا 30 ليتسەنزيا جەڭىپ الدى، دەپ حابارلايدى Kazinform.
ق ر ۇلتتىق وليمپيادالىق كوميتەتى ءمالىم ەتكەندەي، جاس وسپىرىمدەر قۇراماسى جەتى سپورت ءتۇرىنىڭ بەسەۋىنەن ەل نامىسىن قورعاماق.
وسىعان وراي، بۇگىن استانادا ۇلتتىق وليمپيادا كوميتەتى (ق ر ۇ و ك) مەن قازاقستان تۋريزم جانە سپورت مينيسترلىگىنىڭ بىرلەسكەن جيىنى ءوتىپ، ۇلتتىق قۇراما كوماندانىڭ الداعى قىسقى جاس وسپىرىمدەر وليمپياداسىنا قاتىسۋ ماسەلەسى قارالدى.
جۇمىس وتىرىسى جاقىندا تۋريزم جانە سپورت مينيسترلىگى مەن ۇلتتىق وليمپيادا كوميتەتى بىرلەسە اشقان جەدەل ورتالىقتا ءوتتى. ورتالىقتا جاس سپورتشىلاردىڭ كانۆونداعى ناتيجەلەرىنە جەدەل مونيتورينگ جاسالادى. كەيىن اتالعان جەدەل ورتالىق 2024-جىلعى پاريج وليمپياداسىنا دايىندىق كەزەڭىندە جۇمىس ىستەمەك.
2024-جىلعى جاس وسپىرىمدەردىڭ قىسقى وليمپياداسىنا قۇراما كوماندانىڭ دايىندىعى تۋرالى ۆەدومستۆو باسشىلارى، باس باپكەرلەر مەن مەملەكەتتىك جاتتىقتىرۋشىلار مالىمدەپ، قازىرگى تاڭدا جاس وسپىرىمدەر قۇراماسى دايىندىقتىڭ سوڭعى كەزەڭىن وتكىزىپ جاتقانىن حابارلادى.
«وڭتۇستىك كورەياداعى جاس وسپىرىمدەر وليمپياداسىندا قازاقستان نامىسىن سپورتتىڭ بەس ءتۇرى مەن 10 ديستسيپلينا بويىنشا 42 سپورتشى قورعايدى. اتاپ ايتار بولساق، بياتلون، كەرلينگ، كونكيمەن جۇگىرۋ، شورت-ترەك، شايبالى حوككەي، شاڭعى جارىسى، شاڭعىمەن تۇعىردان سەكىرۋ، شاڭعى قوسسايىسى، تاۋ شاڭعىسى، فريستايلدان پاراللەلدى موگۋل بويىنشا باق سىنايدى. ءبىزدىڭ سپورتشىلار 30 جولداما جەڭىپ الدى. 2020-جىلى لوزاننادا وتكەن قىسقى جاس وسپىرىمدەر وليمپياداسىمەن سالىستىرعاندا العا جىلجۋ بايقالادى. ويتكەنى ءتورت جىل بۇرىن ءبىزدىڭ قۇراما ءتورت سپورت ءتۇرى بويىنشا 26 اتلەتتى جارىسقا قوسقان بولاتىن. ودان بولەك، كانۆون-2024 قىسقى ويىندارىندا ۇلتتىق قۇراما جەتىستىككە جەتەتىن الەۋەتكە يە دەپ سەنىممەن ايتا الامىن»، - دەدى جيىندا ءسوز العان ق ر ۇ و ك باس حاتشىسى اندرەي كريۋكوۆ.
ەستەرىڭىزگە سالا كەتەيىك، IV قىسقى جاس وسپىرىمدەر وليمپياداسى بيىل 19- قاڭتار مەن 1- اقپان ارالىعىندا وڭتۇستىك كورەيانىڭ كانۆون قالاسىندا وتەدى. ال فرانسيانىڭ پاريج قالاسىندا XXXIII جازعى وليمپيادا وسى جىلدىڭ 26- شىلدەسى مەن 11- تامىزى ارالىعىندا وتسە، ХVІІ جازعى پاراليمپيادا بيىل 28- تامىز – 8- قىركۇيەك ارالىعىندا وتەدى.
اۆتوركۇنسۇلتان وتارباي
