قىسقى ازيا ويىندارى تاريحىندا العاشقى التىن مەدال جەڭىپ العان قازاقستاندىق سپورتشى كىم
استانا. قازاقپارات - 1996-جىلى، قازاقستان العاش رەت تاۋەلسىز ەل رەتىندە قىتايدىڭ حاربين قالاسىندا وتكەن قىسقى ازيا ويىندارىنا قاتىستى.

حاربيندە وتانداستارىمىز 14 التىن، 9 كۇمىس، 8 قولا مەدالمەن جالپى ەسەپتە جارىس قوجايىندارىنان كەيىن ەكىنشى ورىنعا جايعاستى.
كونكيمەن جۇگىرۋدەن 3000 مەترگە سىنعا تۇسكەن ليۋدميلا پروكاشيەۆا قازاقستان قورجىنىنا تاريحي التىن مەدالدى الىپ بەردى.
- 1996-جىلعى قىسقى ازيا ويىندارىنا العاش رەت قاتىسقاندىقتان، بارلىعى بەيمالىم بولدى. كونكيمەن جۇگىرۋ سپورتىنان ازيادانىڭ العاشقى جۇلدەسى ۇلەستىرىلگەندىكتەن، مەن 3000 مەتر قاشىقتىقتا توپ جاردىم. ودان كەيىن مەنى توقتاۋسىز ءبىر كۇن بويى قۇتتىقتادى. ءتىپتى الەم چەمپيوناتىندا جەڭىمپازدى بۇلاي قۇتتىقتاعانىن كورگەن ەمەسپىن. ءوزىمدى بەينە يۋري گاگارين رەتىندە سەزىندىم، - دەدى پروكاشيەۆا.
ايتا كەتەيىك، ليۋدميلا پروكاشيەۆا سپورتتىق مانسابىندا ناگانوداعى قىسقى وليمپيادادا قولا جۇلدە (1998)، الەم چەمپيوناتىندا كۇمىس جانە قولا مەدال (1995، 1996)، قىسقى ازيا ويىندارىندا ەكى التىن مەدال جەڭىپ العان.
ەسكە سالساق، IX قىسقى ازيا ويىندارى 2025-جىلدىڭ 7-14-اقپانى ارالىعىندا قىتاي حالىق رەسپۋبليكاسى حەيلۋنتسزيان پروۆينتسياسىنىڭ حاربين قالاسىندا وتەدى. سپورتشىلار 12 سپورت ءتۇرى بويىنشا 64 مەدال جيىنتىعىن ساراپقا سالادى.
ق ر تۋريزم جانە سپورت مينيسترلىگىنىڭ حابارلاۋىنشا، قازاقستاننان 139 سپورتشى ەل نامىسىن قورعايدى.
وسىعان دەيىن اق ازيادانىڭ حاربين قالاسىنداعى مۇز سپورتى وتەتىن 5 ارەنا جانە يابۋلي تاۋ شاڭعىسى كۋرورتىندا قار سپورتى وتەتىن 8 جارىس الاڭىندا وتەتىنىن جازعان ەدىك.