قىسقامەتراجدى «سابىر» فيلمى حالىقارالىق پلاتفورمادا كوش باستادى

استانا. KAZINFORM - ق ر مادەنيەت جانە اقپارات مينيسترلىگىنىڭ جانە ۇلتتىق كينونى قولداۋ مەملەكەتتىك ورتالىعىنىڭ قولداۋىمەن تۇسىرىلگەن «سابىر» قىسقامەتراجدى فيلمى حالىقارالىق اۋديتوريانىڭ قولداۋىنا يە بولدى.

مينيسترلىك مالىمەتىنشە، تۋىندى Cineshort قىسقامەتراجدى فيلمدەرىنىڭ الەمدىك پلاتفورماسىندا رەيتينگ كوشباسشىلارىنىڭ قاتارىنا ەندى.

فيلمدە وقىپ، جازا المايتىن ەكىنشى سىنىپ وقۋشىسى سابىرجاننىڭ وقيعاسى باياندالادى. اناسى مەن مۇعالىمدەرى ونى تۇسىنە المايدى. بالادا ديسلەكسيا دەرتى بار ەكەنىن بىلمەي، ءجيى سوگەدى. ال بۇل - ۇلكەندەر تاراپىنان تۇسىنىستىكتى قاجەت ەتەتىن ەرەكشەلىك.

فيلم ماڭىزدى الەۋمەتتىك تاقىرىپتى كوتەرەدى جانە كورەرمەنگە مەكتەپتەگى بالالاردىڭ قيىندىقتارىنا مۇقيات قاراۋ قاجەتتىگىن جەتكىزەدى. فيلمنىڭ رەجيسسەرلەرى - مارينا زيبەرت پەن دامير تاناتوۆ.

جوبا ۇلتتىق جانە حالىقارالىق دەڭگەيدە جوعارى باعالاندى. «سابىر» VIII حالىقارالىق BAIQONYR كينوفەستيۆالىنىڭ ۇلتتىق بايقاۋىندا «ۇزدىك فيلم» جۇلدەسىنىڭ يەگەرى اتاندى، ال باستى ءرولدى ويناعان جاس اكتەر ساليح بەيسەنباي ءرولىن ۇزدىك سومداعانى ءۇشىن ماراپاتتالدى.

سونىمەن قاتار فيلم UMUT حالىقارالىق كينوفورۋمىندا «ۇزدىك رەجيسسەر» سىيلىعىن جەڭىپ الدى. فيلم تورونتوداعى Peaks Central Asian Film Festival اياسىندا سولتۇستىك امەريكا پرەمەراسىندا ۇسىنىلدى.

ايتا كەتەيىك، Cineshort - بۇل ءداستۇرلى جانرداعى اۆتورلىق جانە فەستيۆالگە ارنالعان فيلمدەردى ۇسىناتىن حالىقارالىق قىسقامەتراجدى فيلمدەر پلاتفورماسى.

«سابىر» كارتيناسى 9,3 بال جيناپ، كورەرمەن قىزىعۋشىلىعىن تۋدىردى.

ايتا كەتەيىك، «قاجىمۇقان» فيلمى يتالياداعى فەستيۆالدا بىرنەشە جۇلدە الدى.