قىس مەزگىلىندە كولىكتى قالاي جۇرگىزۋ كەرەك: تاجىريبەلى ماماننان 6 كەڭەس
ەلىمىزدىڭ كەيبىر وڭىرلەرىندە قىس قاتتى بولادى. اياز قىسقان كۇندەرى كولىكتى قىزدىرۋ قيىنعا سوعاتىنى بار.
وسى ورايدا، پرەزيدەنت ءىس باسقارماسى اۆتوشارۋاشىلىعىنىڭ 50 جىلعا جۋىق تاجىريبەسى بار كولىك جۇرگىزۋشىسى قايرات نۇرماعامبەتوۆ قىس مەزگىلىندە اۆتوكولىكتى كۇتۋ جانە قىزدىرۋ تۋرالى بىرنەشە كەڭەس بەردى، دەپ حابارلايدى Kazinform.
ايازدى كۇندەرى الدىمەن كولىكتى ىسكە قوسۋ قاجەت. قىستا جۇرگىزۋشى ءۇشىن ەڭ قاۋىپتى نارسە: ءتۇنى بويى تومەنگى تەمپەراتۋرادا تۇرعان كولىكتىڭ وتالماي قالۋى. وسى ورايدا، كولىكتى ىسكە قوسپاس بۇرىن بارلىق فۋنكتسيالارىن ءوشىرىپ العان ءجون، ياعني جارىق شامدارىنىڭ، پەشىنىڭ جانە جىلىتۋ جۇيەسىنىڭ ءسوندىرۋلى تۇرعانىنا كوزى جەتكىزىپ الىڭىز.
قوزعالتقىشقا باتارەيانى پايدالانۋ. كىلتتى بۇراعان كەزدە، قوزعالتقىشتى ءسال اينالدىرىپ تۇرىڭىز. ءبىراق ونى 10 سەكۋندتان ارتىق ۇستاماعان ءجون، ايتپەسە ستارتەرگە زيانى ءتيۋى مۇمكىن. ەگەر بۇدان پايدا بولماسا، بىرنەشە مينۋت كۇتىپ، قايتالاپ كورىڭىز. ەگەر اككۋمۋلياتور تولىق قاتىپ قالسا، وندا اۆتوموبيلدەگى باسقا اككۋمۋلياتورمەن وتالدىرىپ كورۋ كەرەك.
جالپى، قىس مەزگىلىنە كولىكتى ازىرلەگەندە ساپالى اككۋمۋلياتور قويعان ابزال. قوسىمشا اككۋمۋلياتور الىپ ءجۇرۋدىڭ دە ارتىقتىعى جوق.
قىستىڭ كۇنى كولىكتىڭ تەرەزەسى ءجيى بۋلانادى نەمەسە ايازدان قىراۋ قاتىپ قالىپ جاتادى. مۇنداي بولماس ءۇشىن ءجۇرىپ كەلگەن كولىكتىڭ ەسىكتەرىن بىرنەشە مينۋتقا اشىپ قويۋعا كەڭەس بەرەمىز. سوندا تاڭەرتەڭ تەك اينەككە تۇسكەن قاردى سىپىرىپ تاستايسىز، بولدى.
شينالاردىڭ اۋا قىسىمى. قورشاعان اۋانىڭ تەمپەراتۋراسى تومەندەگەن كەزدە، شينانىڭ دا قىسىمى كەميدى. سوندىقتان، قىسقى رەزەڭكەنى اۋىستىرۋ ارقىلى شينانىڭ قىسىمىن رەتتەپ العان دۇرىس، ويتكەنى دۇرىس قىسىمدى شينالار قاۋىپسىز جانە جانارماي ۇنەمدەۋگە مۇمكىندىك بەرەدى.
كولىكتىڭ اينالارىن تازا ۇستاۋ. راس، تاڭعى ۋاقىتتا قىراۋ قاتىپ قالعان اينانى تازالاۋ ءبىرشاما اۋرەگە تۇسىرەدى. بۇل ورايدا، اينالاردى ايازدىڭ الىندا ءسۇرتىپ قويۋعا كەڭەس بەرەمىز. بۇل اينانىڭ جارىلىپ، سىزىلۋىنا جانە زاقىمدانۋىنا جول بەرمەيدى، سونىمەن قاتار مۇزدىڭ تەز تۇسۋىنە اسەر ەتەدى.
اۆتوكولىكتى تۇراق تەجەگىشىنە دۇرىس قويۋ دا ماڭىزدى. جۇرگىزۋشىنىڭ ايتۋىنشا، تەجەگىش جۇيەسى سۋىعانشا ءبىرشاما كۇتۋ كەرەك.
ايتا كەتسەك، كولىك جۇرگىزۋشىسى قايرات نۇرماعامبەتوۆتىڭ 46 جىل تاجىريبەسى بار. ەڭبەك جولىن اقمولا وبلىسىنداعى جارسۋات اۋىلىنان باستاعان. سونىڭ ىشىندە سوڭعى 26 جىلدا پرەزيدەنت ءىس باسقارماسى اۆتوشارۋاشىلىعىندا كولىك جۇرگىزىپ ءجۇر.
