قىرىم تاتارىنان دومبىرا ۇيرەندىم - جاپون كۇيشىسىمەن سۇحبات
استانا. KAZINFORM - سوڭعى كەزدەرى الەۋمەتتىك جەلىدە دومبىرا شەرتكەن جاپون ازاماتىنىڭ بەينەجازباسى كورەرمەننىڭ قوشەمەتىنە بولەندى. قازىرگە دەيىن 1,5 ميلليونعا جۋىق قارالىم جيناپ ۇلگەرگەن ۆيدەونى توكيودا جۇمىس ىستەيتىن قازاقستاندىق كاسىپكەر تاسپالاعان. ۆيدەونىڭ اۆتورى مەن كەيىپكەرى «بۇگىن LIVE» باعدارلاماسىنا ونلاين بايلانىسقا شىعىپ سۇحبات بەردى.
- قازىر مەن جۇكتەگەن ۆيدەو 1,4 ميلليون قارالىم جينادى. ءوزىم توكيودا جاپون كومپانياسىندا جۇمىس ىستەيمىن. كۇندەلىكتى جۇمىستارىممەن كەتىپ بارا جاتقاندا جاقىن ماڭايدان دومبىرانىڭ داۋىسىن ەستىدىم. سول ءساتتى وتكىزىپ الماۋ ءۇشىن بىردەن تەلەفونىمنىڭ كامەراسىن قوسىپ، كۇي ويناپ جاتقان ادامنىڭ قاسىنا بارسام، جاپون جىگىتى ورىنداپ وتىر ەكەن. ول جىگىتتىڭ ەسىمى اكيرا تاكەگۋچي. وسى جاعدايدان كەيىن جاقسىلاپ تانىسىپ، دوستاسىپ كەتتىك، - دەيدى ەلدوس سۇگىرباي.
ال جاپوندىق كۇيشى دومبىرا تارتۋدى تۇركيادا تۇراتىن نوعاي ازاماتىنان ۇيرەنگەن ەكەن.
- بىرنەشە جىل بۇرىن تۇركى ەلدەرىنىڭ تاريحىنا كوڭىلىم اۋعان ەدى. سول ءۇشىن تۇركياعا بارىپ وقىدىم. تۇرىكتەر مەن قازاقتاردىڭ شىعۋ تەگى ۇقساس بولعاندىقتان، دومبىرامەن تانىستىم. سول كەزدە مەن قىرىم تاتارىنىڭ، ياعني نوعاي ازاماتىنىڭ ۇيىندە تۇردىم. ول كىسى دومبىرا شەرتە الاتىن ەدى. ماعان دومبىرادا ويناۋدى سول كىسى ۇيرەتتى. سولاي تۇركيادا ءجۇرىپ دومبىرانى ۇيرەندىم، - دەيدى اكيرا تاكەگۋچي.
اكيرا بۇگىنگە دەيىن كۇيشى، دومبىراشى سەكەن تۇرىسبەكپەن دە كەزدەسىپ ۇلگەرىپتى. بىرنەشە رەت قازاقستاندا دا بولعان. وعان قوسا، ءبىرتالاي كۇيدى ورىنداي الادى. جاپوندىق كۇيشى جاقىندا كونسەرت بەرۋدى جوسپارلاپ وتىرعان كورىنەدى.
اۆتور
ارۋجان ماحمۋت
