قىرعىزستاندىقتار قازاقستان كينوسىن قالاي باعالادى
استانا. KAZINFORM - بىشكەكتەگى «الا-توو» كينوتەاترىندا 28-30 قىركۇيەك ارالىعىندا قازاقستان كينوسى كۇندەرى ءوتىپ جاتىر، دەپ حابارلايدى Kazinform اگەنتتىگىنىڭ بىشكەكتەگى مەنشىكتى ءتىلشىسى.
ءىس-شارانىڭ رەسمي اشىلۋىندا قىرعىز رەسپۋبليكاسىنىڭ مادەنيەت، اقپارات جانە جاستار ساياساتى مينيسترلىگى جانىنداعى كينەماتوگرافيا دەپارتامەنتىنىڭ ديرەكتورى تالانتبەك تولوبەكوۆ بىشكەكتەگى تاريحى تەرەڭ، ەڭ كونە كينوتەاترلاردىڭ بىرىندە قازاقستان كينوسى كۇندەرىن وتكىزۋ قىرعىزستان ءۇشىن ۇلكەن مارتەبە ەكەنىن اتاپ ءوتتى.
- ەكى ەلدىڭ كينەماتوگرافياسى تۋرالى شەكسىز ايتۋعا بولادى. بۇل - ونداعان جىل بويى جالعاسىپ كەلە جاتقان بەرىك بايلانىس. ءبىزدىڭ تامىرىمىز تەرەڭ، ءداستۇرىمىز بەرىك. قىرعىزستان تاۋەلسىزدىك العان كەزدە ەلدەگى العاشقى پروديۋسەرلەر قازاقستاندىق ارىپتەستەر بولدى، سونىمەن قاتار قىرعىز رەجيسسەرلەرى قازاقستاندا جۇمىس ىستەي باستادى. الەمدىك كينەماتوگرافيا تاريحىنا ەنگەن كوپتەگەن بىرلەسكەن جوبالارىمىز پايدا بولدى. بۇگىن قازاقستان كينوسى كۇندەرىنىڭ اشىلۋىندا كورسەتىلىپ وتىرعان فيلم 2026-جىلعى بىشكەك كينوفەستيۆالى باعدارلامالارىنىڭ ءبىرىنىڭ جەڭىمپازى اتاندى. حالىقارالىق جانە ورتالىق ازيا قازىلار القاسى قازاقستاندىق كينونىڭ جوعارى دەڭگەيىن جانە ارىپتەستەرىمىزدىڭ كاسىبي شەبەرلىگىن اتاپ ءوتتى، - دەدى تالانتبەك تولوبەكوۆ.
قازاقستاننىڭ قىرعىزستانداعى ەلشىلىگىنىڭ كەڭەسشى-ەلشىسى اسحات سىزدىقوۆ قۇتتىقتاۋ سوزىندە قوناقتارعا قاتىسقانى ءۇشىن العىس ءبىلدىرىپ، كينەماتوگرافيا ارقىلى مادەني الماسۋدى دامىتۋ قازاقستان مەن قىرعىزستان اراسىنداعى گۋمانيتارلىق بايلانىستاردى ودان ءارى نىعايتۋ ءۇشىن ەرەكشە ماڭىزعا يە ەكەنىن اتاپ ءوتتى.
«قازاقفيلم» ۇلتتىق كينوستۋدياسى» اكتسيونەرلىك قوعامىنىڭ كينووندىرىس جانە دۋبلياج ءبولىمىنىڭ باس مامانى بوتاگوز ايمامبەتوۆانىڭ ايتۋىنشا، بىشكەكتە قازاقستان كينوسى كۇندەرىن وتكىزۋدەگى ماقسات - قازاقستان مەن قىرعىزستان اراسىنداعى ونەر جانە مادەني مۇرا سالاسىنداعى تاجىريبە الماسۋ، سونداي-اق ەكى ەلدىڭ كينويندۋسترياسىمەن تانىستىرۋ.
ءىس-شارانىڭ اشىلۋىندا فانتاستيكا ەلەمەنتتەرى بار «Qaitadan» فيلمى كورسەتىلدى. تولىقمەتراجدى كارتينانىڭ رەجيسسەرى - دۋمان ەركىمبەك. بۇل - قازاقستان كينەماتوگرافياسى تاريحىنداعى اپاتتار جانرىنداعى العاشقى تۋىندى.
فيلمدە اتا-اناسىمەن جانجالداسقاننان كەيىن اجەسىنىڭ اۋىلىنا بارعان قالالىق ءجاسوسپىرىم راۋاننىڭ وقيعاسى باياندالادى. سول جەردە ول ۋاقىت ىلمەگىنە تۇسەدى: ءبىر كۇن قايتا-قايتا قايتالانا بەرەدى، ال وقيعا بوگەتتىڭ جويقىن بۇزىلۋىمەن اياقتالادى. اپاتتىڭ الدىن الىپ، جاقىندارىن قۇتقارۋعا تىرىسقان كەيىپكەر ىشكى وزگەرىستەن ءوتىپ، ومىرگە دەگەن كوزقاراسىن قايتا قاراستىرادى.
فيلم قازاقستان رەسپۋبليكاسىنىڭ مادەنيەت جانە اقپارات مينيسترلىگى مەن ۇلتتىق كينونى قولداۋ مەملەكەتتىك ورتالىعىنىڭ قولداۋىمەن تۇسىرىلگەن. فيلم 2025 -جىلعى قىركۇيەكتە كەڭ پروكاتقا شىقتى.
نۋبولوت ەسىمدى جاس كورەرمەن فيلمدى تاماشالاعاننان كەيىنگى اسەرىمەن ءبولىستى.
- ماعان فيلم وتە ۇنادى. باسىندا وقيعانىڭ ۇنەمى قايتالانا بەرۋىنە بايلانىستى فيلمدى ءتۇسىنۋ قيىن بولدى. شەشىمى وتە كەرەمەت بولدى. جاعىمدى ەموتسياعا بولەندىم. فيلمنىڭ بەرىلۋى مەن اكتەرلەردىڭ ويىنى جوعارى دەڭگەيدە، - دەدى ول.
كانىشاي ەسىمدى قالا تۇرعىنىنىڭ پىكىرىنشە، بۇگىنگى كورسەتىلىم كورەرمەندى باسىنان اياعىنا دەيىن ەرەكشە اسەردە ۇستادى. فيلمدى تاماشالاۋ بارىسىندا زالداعى كورەرمەندەر كۇلكىدەن كوز جاسىنا دەيىن ءتۇرلى ەموتسيانى باستان وتكەردى.
- جىگىتتىڭ ءبارىن قۇتقارىپ قالعان فيلمنىڭ جاقسى اياقتالعانىنا قۋاندىق. ءتۇسىرىلىم توبىنا العىسىمىزدى بىلدىرەمىز. كەرەمەت شىققان، - دەدى ول.
قازاقستان كينوسى كۇندەرى 29-30 قىركۇيەكتە «التىن ادام» تولىقمەتراجدى انيماتسيالىق فيلمى مەن «جابايى» وتباسىلىق فيلمىن تەگىن كورسەتۋمەن جالعاسادى.
2026-جىلعى مامىردا بىشكەكتەگى عاپار ايتيەۆ اتىنداعى مەملەكەتتىك بەينەلەۋ ونەرى مۋزەيىندە قازاقستاندىق سۋرەتشىلەر ءۇمىرالى يسمايلوۆ پەن ءماجيت بايتەنوۆتىڭ «ۇلى دالا اڭىزدارى» اتتى كارتينالار كورمەسى وتكەن بولاتىن.
