قىرعىزستاننىڭ ەكس-پرەزيدەنتى المازبەك اتامبايەۆتىڭ ۇلى باس بوستاندىعىنان ايىرىلدى
استانا. KAZINFORM - بىشكەكتىڭ پەرۆوماي اۋداندىق سوتى بيلىكتى كۇشپەن باسىپ الۋعا قاتىستى قىلمىستىق ءىس بويىنشا ۇكىم شىعاردى. ىسكە قىرعىزستاننىڭ بۇرىنعى پرەزيدەنتى المازبەك اتامبايەۆتىڭ ۇلى قادىر اتامبايەۆتى قوسا العاندا، «سوتسيال دەموكراتتار» پارتياسىنىڭ وكىلدەرى ايىپتالۋشى رەتىندە تانىلعان. بۇل تۋرالى Kazinform اگەنتتىگىنىڭ بىشكەكتەگى مەنشىكتى ءتىلشىسى حابارلايدى.
سوت وتىرىسى جابىق رەجيمدە ءوتتى.
جەرگىلىكتى ب ا ق-تىڭ مالىمەتىنشە، قادىر اتامبايەۆ 4 جىلعا باس بوستاندىعىنان ايىرىلدى. ونىڭ مۇلكى تاركىلەنىپ، جازاسىن جالپى رەجيمدەگى تۇزەۋ كولونياسىندا وتەۋ بەلگىلەندى.
ايىپتالۋشىلاردىڭ قاتارىندا «سوتسيال دەموكراتتار» پارتياسىنىڭ جەتەكشىسى تەميرلان سۇلتانبەكوۆ تە بار. وعان 7 جىل باس بوستاندىعىنان ايىرۋ جازاسى تاعايىندالىپ، مۇلكىن تاركىلەۋ جانە جازاسىن جالپى رەجيمدەگى تۇزەۋ كولونياسىندا وتەۋ تۋرالى ۇكىم شىعارىلدى.
ەسكە سالا كەتەيىك، قىلمىستىق ءىس 2025 -جىلدىڭ قاراشا ايىنىڭ سوڭىندا قوزعالعان. قىرعىز رەسپۋبليكاسى ءى ءى م-نىڭ نۇسقاسى بويىنشا، ءىس بويىنشا ايىپتالعاندار جوگوركۋ كەنەشكە وتكەن مەرزىمىنەن بۇرىنعى سايلاۋدىڭ قورىتىندىسى شىعارىلعاننان كەيىن جاپپاي تارتىپسىزدىكتەر مەن نارازىلىق اكسيالارىن ۇيىمداستىرۋدى جوسپارلاعان.
2025 -جىلعى ماۋسىمدا بىشكەكتىڭ پەرۆوماي اۋداندىق سوتى قىرعىز رەسپۋبليكاسىنىڭ بۇرىنعى پرەزيدەنتى المازبەك اتامبايەۆتى 2019 -جىلعى تامىزدا قوي-تاشتا بولعان وقيعالارعا بايلانىستى سىرتتاي 11 جىل 6 ايعا باس بوستاندىعىنان ايىرۋعا، مۇلكىن تاركىلەپ، مەملەكەتتىك ناگرادالارىنان ايىرۋعا ۇكىم شىعارعانى حابارلانعان ەدى.
سونىمەن قاتار 2025 -جىلعى جەلتوقساندا قىرعىزستان پرەزيدەنتى سادىر جاپاروۆ المازبەك اتامبايەۆتى بارلىق مەملەكەتتىك ناگرادالارىنان ايىرۋ تۋرالى جارلىققا قول قويدى.
