قىرعىزستاندىقتار جانارمايدىڭ ءار ليترىنە سالىق تولەيتىن بولادى
استانا. KAZINFORM - قىرعىزستاندا ساتىلعان جانار-جاعارمايدىڭ ءار ليترى ءۇشىن الىم الىنباق. جوگوركۋ كەنەش ءتيىستى زاڭ جوباسىن ەكىنشى جانە ءۇشىنشى وقىلىمدا ماقۇلدادى، دەپ حابارلايدى Kazinform-نىڭ مەنشىكتى ءتىلشىسى.
انىقتاپ ايتقاندا مۇناي ونىمدەرىن ەسەپكە الۋ مەن ساقتاۋدىڭ اۆتوماتتاندىرىلعان جۇيەسىن پايدالانا وتىرىپ، جانار-جاعارماي قۇيۋ ستانسيالارىندا بولشەك ساۋدادا وتكىزۋ كەزىندە جانار-جاعارمايدىڭ ءاربىر ليترىنە الىم الىنادى. الىم الۋ ءتارتىبىن قىرعىزستاننىڭ مينيسترلەر كابينەتى بەلگىلەيدى.
جانارماي ساتۋدان تۇسكەن قاراجات رەسپۋبليكالىق بيۋجەتكە جىبەرىلەدى. كەيىن ول جول قورىنا جيناقتالماق. 2023-جىلى قىرعىزستانداعى جول قورىنىڭ بيۋجەتى شامامەن 4,5 ميلليارد سومدى قۇراعان. 2025-جىلى جاڭا تولەم ەنگىزىلسە بۇل 5 ميلليارد سومعا جەتپەك.
بۇعان دەيىن بىشكەك ەل استاناسىنا باسقا قالالاردان كەلەتىن كولىكتەردىڭ كىرۋى ءۇشىن جانە جەكە موبيلدى قۇرال-جابدىقتاردى پايدالانعانى ءۇشىن الىم الۋدى جانە شەتەلدىكتەر ءۇشىن تۋريستىك سالىق ەنگىزۋدى جوسپارلاپ وتىرعانى حابارلاندى.
