قىرعىزستاندىق فۋتبولشى ۋكراينالىق ويىنشىنى ۇرىپ، جاعىن سىندىردى

بىشكەك. KAZINFORM - قىرعىزستان قۇراماسىنىڭ ويىنشىسى ميربەك احماتاليەۆ جالالابادتىڭ «مۋراس يۋنايتەد» كومانداسىنداعى ۋكراينالىق ويىنشىمەن توبەلەسكەنى ءۇشىن 5 جىلعا سپورتتان شەتتەتىلدى. بۇل تۋرالى AKIpress قىرعىزستان فۋتبول وداعىنا سىلتەمە جاساپ حابارلادى.

اعىمداعى جىلدىڭ 15-تامىزىندا بىشكەكتەگى «سەلماش» ستاديونىندا «مۋراس يۋنايتەد» كومانداسىنىڭ جاتتىعۋى كەزىندە ويىنشىلارعا قاتىستى وقيعا ورىن العانى اتاپ ءوتىلدى. ياعني، وقۋ-جاتتىعۋ جيىنى كەزىندە احماتاليەۆ كلۋبتىڭ لەگيونەر ويىنشىسى ەۆگەني تەرسيدى ۇرىپ، جاعىن سىندىرعان.

وسىدان كەيىن كلۋب ميربەك احماتاليەۆپەن كەلىسىمشارتتى بۇزۋ تۋرالى شەشىم قابىلدادى.

وسىعان بايلانىستى ول 5 جىلعا دەيىن فۋتبولدان شەتتەتىلدى.

- وقيعادا كلۋبتىڭ شەتەلدىك ويىنشىسى، جارتىلاي قورعاۋشى ەۆگەني تەرسي جاراقات الىپ، جاق سۇيەگى سىنعان. وقيعاعا سەبەپكەر بولعان ويىنشى ميربەك احماتاليەۆپەن كلۋبتىڭ ەڭبەك قاتىناستارىن توقتاتۋ تۋرالى شەشىم قابىلداندى، - دەلىنگەن حابارلامادا.

سونىمەن قاتار، وقيعادان كەيىن كلۋبتىڭ باپكەرلەر شتابى مەن سپورت ديرەكتورى دا جۇمىستان بوساتىلدى.

ايتا كەتەيىك، 30 جاستاعى ميربەك احماتاليەۆ قىرعىزستان قۇراماسى ساپىندا 2016 -جىلى دەبيۋت جاساپ، ودان كەيىن كوماندا ساپىندا 4 ويىن وتكىزگەن.

بۇعان دەيىن رونالدۋ «ءال-ناسر» كلۋبىنا زيداندى باس باپكەر ەتۋدى سۇراعانىن جازعان ەدىك.

اۆتور
جاراسقان نۇرىبايەۆ