قىرعىزستاندىق «فۋرا» جۇرگىزۋشىسى ق ر تەرريتورياسىندا مەملەكەتتىك نومەرىن وزگەرتىپ الىپ، جىلدامدىقتى اسىرعان

تاراز. KAZINFORM - جامبىل وبلىسى مەركى اۋدانى ماڭىنداعى تاس جولدا كولىگىنىڭ ءنومىرىن وزگەرتىپ العان «فۋرا» جۇرگىزۋشىسىن ۇستالدى، دەپ حابارلايدى وبلىستىق پوليتسيا دەپارتامەنتىنىڭ باسپا ءسوز قىزمەتى.

پوليتسيا قىزمەتكەرلەرى «قۇقىقتىق ءتارتىپ» پروفيلاكتيكالىق ءىس-شاراسى بارىسىندا «اۆتوسكاننار» موبيلدى كەشەنىنىڭ كومەگىمەن ءوتىپ بارا جاتقان DAF ماركالى جۇك كولىگىنىڭ مەملەكەتتىك نومىردەگى ءبىر ءارپى باسقا ەكەنىن انىقتاعان. قىرعىز رەسپۋبليكاسىنىڭ 33 جاستاعى تۇرعىنى بۇل ارەكەتىن جولدا جىلدامدىقتى اسىرعانى ءۇشىن بەينەكامەرالارعا ءتۇسىپ قالماۋ ماقساتىندا جاساعانىن مويىندادى.

جۇرگىزۋشىنىڭ قىرعىزستاننان رەسەيگە قىتاي اۆتوكولىكتەرىن تاسىمالداۋمەن اينالىساتىنى بەلگىلى بولدى.

مەركى اۋداندىق سوتىنىڭ شەشىمىمەن قۇقىق بۇزۋشى 1 جىلعا جۇرگىزۋشى كۋالىگىنەن ايىرىلىپ، 2 تاۋلىككە اكىمشىلىك قاماققا الىندى.

ايتا كەتسەك، ءبىز بۇعان دەيىن جۇرگىزۋشى كۋالىگىن الۋ ءۇشىن قازاقستاندا ەمتيحان تاپسىرۋ كەزىندە جاڭا ەرەجە ەنگىزىلەتىنىن جازعان بولاتىنبىز.

اۆتور
ورالحان ءداۋىت