قىرعىزستاندا سەل كەزىندە جوعالعان ەكى جاسار بالانىڭ دەنەسى تابىلدى

 استانا. KAZINFORM - قىرعىزستاننىڭ وش وبلىسى نووقات اۋدانى اپشىر- اتا اۋىلىندا سەل الىپ كەتكەن ەكى جاسار بالانىڭ دەنەسى تابىلدى.

بۇل تۋرالى قىرعىز رەسپۋبليكاسى توتەنشە جاعدايلار مينيسترلىگىنىڭ باسپا ءسوز قىزمەتى حابارلادى، دەپ جازدى كابار اقپارات اگەنتتىگى.

ۆەدومستۆونىڭ مالىمەتىنشە، جەدەل ىزدەستىرۋ شارالارىنىڭ ناتيجەسىندە بالانىڭ دەنەسى كەشە ساعات 15.50 دە تابىلعان. بالانى جەرگىلىكتى تۇرعىندار تاۋىپ، ىشكى ىستەر مينيسترلىگىنىڭ قىزمەتكەرلەرىنە تاپسىردى.

قازىرگى كەزدە قۇقىق قورعاۋ ورگاندارى ونىڭ تۇلعاسىن ناقتىلاپ جاتىر.

سەل سالدارىنان قۇربان بولعاندار سانى 10 ادامعا جەتتى.

«بۇگىن ىزدەۋ جۇمىستارىنا 85 قۇتقارۋشى مەن 100 دەن استام جەرگىلىكتى تۇرعىن جۇمىلدىرىلدى»، - دەلىنگەن حابارلامادا.

ەسكە سالا كەتسەك، قىرعىزستاننىڭ وش وبلىسىنداعى نووقات اۋدانىندا جۇرگەن سەلدىڭ سالدارىنان مەرت بولعاندار سانى 9 ادامعا جەتكەنىن جازعان بولاتىنبىز.

سەل جولداردى شايىپ، كوپىرلەر مەن ەلەكتر قوسالقى ستانتسيالارىن قيراتتى. اپشىر- اتا دەمالىس ايماعى مەن كەزارت جايلاۋىندا 1400 گە جۋىق ادام سەل ورتاسىندا قالدى. كەيىن ولار توتەنشە جاعدايلار مينيسترلىگىنىڭ تىكۇشاعىمەن ەۆاكۋاتسيالاندى.

جويقىن سەل تاسقىنىنان قازاقستاندىق بالالار كوز جۇمعانى بەلگىلى بولدى.

وسى وقيعاعا بايلانىستى قاسىم-جومارت توقايەۆ قىرىزستان پرەزيدەنتى سادىر جاپاروۆقا كوڭىل ايتتى.