قىرعىزستاندا قازاقستاندىق كاسىپكەر ۆلاديمير جۇمانبايەۆقا ىزدەۋ جاريالاندى
بىشكەك. KAZINFORM - قىرعىزستاننىڭ ۇلتتىق قاۋىپسىزدىك مەملەكەتتىك كوميتەتى قازاقستاندىق كاسىپكەر، «ۆەرتەكس گولد» كومپانياسىنىڭ يەسى ۆلاديمير جۇمانبايەۆقا ق. اسانبەكتىڭ (قامشى كولبايەۆ) ۇيىمداسقان قىلمىستىق توبىن قارجىلاندىرعانى ءۇشىن ىزدەۋ جاريالادى.
ۇ ق م ك مالىمەتىنشە، تەرگەۋ امالدارى اياسىندا قىلمىستىق جولمەن الىنعان كىرىستەردى زاڭداستىرۋ (جىلىستاتۋ) فاكتىسى بويىنشا تىركەلگەن سوتقا دەيىنگى ءىس جۇرگىزۋ ماتەريالدارىندا قازاقستاننىڭ ءىرى بيزنەسمەندەرىنىڭ ءبىرى ۆلاديمير جۇمانبايەۆتىڭ «اعايىندار ورتاسى» حالىقارالىق قىلمىستىق توبىنىڭ قۇرامىنا كىرگەن «زاڭداعى ۇرى» اتالعان ق. اسانبەكتىڭ ۇيىمداسقان قىلمىستىق توبىنىڭ قىزمەتىن قارجىلاندىرۋ فاكتىلەرى انىقتالعان.
«اتالعان تۇلعا ق. اسانبەكتىڭ قىلمىستىق قوعامداستىقتىڭ قۇرامىنداعى كاسىپكەرلەردەن رەكەت، بوپسالاۋ تۇرىندەگى زاڭسىز ارەكەتتەردەن جۇيەلى تۇردە قاراجات الۋى، سونداي- اق اۋىر قىلمىستار ءۇشىن بىرنەشە رەت سوتتالعانى، سونداي- اق ونىڭ «ادام ءولتىرۋ»، «ادام ۇرلاۋ» جانە «قىلمىستىق قوعامداستىق (قىلمىستىق ۇيىم) ۇيىمداستىرۋ» باپتارىمەن اسا اۋىر قىلمىستار بويىنشا تالاي رەت سوتتالعانىن بىلە تۇرا، قىرعىز رەسپۋبليكاسىنىڭ اۋماعىندا بىرلەسكەن بيزنەس جوبالاردى جۇزەگە اسىرۋ ءۇشىن قولداۋ جانە قامقورلىق الۋ ماقساتىندا ق. اسانبەكپەن بايلانىس ورناتقان»، - دەلىنگەن حابارلامادا.
«ۆ. گ. ك. » ج ش س- ءنىڭ قىرعىز رەسپۋبليكاسى اۋماعىنداعى التىن وندىرۋمەن، كەندەر مەن باعالى مەتالداردى بايىتۋمەن اينالىساتىن يەسى بولا وتىرىپ، ۆ. جۇمانبايەۆ التىن ءوندىرۋشى كومپانيانىڭ جاۋاپتى قىزمەتكەرلەرى ارقىلى ق. اسانبەككە 2021-2023 -جىلدار ارالىعىندا اي سايىن 1 ميلليون سوم جىبەرىپ وتىرعان.
ىزدەۋدەگى ازامات ق. اسانبەكپەن ىستىقكول وبلىسىندا ورنالاسقان «بارس» دەمالىس بازاسىنىڭ اۋماعىندا كەزدەسىپ، دەمالعان. بۇل جەرگە ول جەكە ۇشاقپەن كەلگەنى اتاپ وتىلگەن.
سوتقا دەيىنگى ءىس جۇرگىزۋدى تەرگەپ-تەكسەرۋ اياسىندا «ۆ. گ. ك» ج ش س قىزمەتى كىرىستەرىنىڭ ناقتى كورسەتكىشتەرىن جاسىرۋ ماقساتىندا قىرعىز رەسپۋبليكاسىنىڭ مەملەكەتتىك ورگاندارىنا التىن كەنىن ءوندىرۋ تۋرالى جالعان مالىمەتتەر بەرۋ فاكتىلەرى انىقتالعان.
بىشكەك قالاسىنىڭ وكتيابر اۋداندىق سوتىنىڭ قاۋلىسىمەن ۆ. جۇمانبايەۆقا قاتىستى سىرتتاي قاماۋعا الۋ تۇرىندەگى بۇلتارتپاۋ شاراسى تاڭدالدى.
اتالعان تۇلعاعا قىلمىستىق قۋدالاۋ ءۇشىن مەملەكەتارالىق ىزدەۋ جاريالاندى.
