قىرعىزستاندا مەمقىزمەتكە ورنالاسۋشىلاردى جالعان ءسوز دەتەكتورىمەن تەكسەرمەك
قىرعىزستاندا مەملەكەتتىك جانە مۋنيتسيپالدىق قىزمەت كانديداتتارىن جۇمىسقا قابىلداۋ كەزىندە پوليگراف ارقىلى تەكسەرۋدى جوسپارلاپ وتىر.
بۇل تۋرالى بۇگىن «كابار» اگەنتتىگىندە وتكەن باسپا ءسوز ءماسليحاتىندا قىرعىز رەسپۋبليكاسىنىڭ مەملەكەتتىك قىزمەت جانە جەرگىلىكتى ءوزىن-ءوزى باسقارۋ ىستەرى جونىندەگى مەملەكەتتىك اگەنتتىگىنىڭ ديرەكتورى قۇدايبەرگەن بازاربايەۆ ءمالىم ەتتى، دەپ حابارلايدى Kazinform اگەنتتىگى.
«رەزەرۆكە الۋ جانە مۋنيتسيپالدىق جانە مەملەكەتتىك ورگانداردىڭ باسشىلىق لاۋازىمدارىنا تاعايىنداۋ كەزىندە پوليگرافتان ءوتۋدىڭ نەگىزگى ماقساتى - كانديداتتىڭ سىبايلاس جەمقورلىققا قاتىستى العىشارتتارىن انىقتاۋ. پوليگراف مەملەكەتتىك جانە مۋنيتسيپالدىق قىزمەتكەرلەر اراسىنداعى سىبايلاس جەمقورلىققا قارسى كۇرەستە قولدانىلىپ، پاتريوتتاردى بيلىككە تارتۋعا كومەكتەسەدى. بۇگىندە بۇل باعىتتا ءتيىستى نورماتيۆتىك-قۇقىقتىق اكتىلەر ازىرلەنۋدە»، - دەدى ول.
بازاربايەۆتىڭ سونىمەن قاتار اتاپ وتۋىنشە، اگەنتتىك بولاشاق مەملەكەتتىك قىزمەتكەردىڭ بويىنان كاسىبي، ادامگەرشىلىك جانە پسيحولوگيالىق قاسيەتتەردى جان-جاقتى باعالاۋ، سونداي-اق IQ دەڭگەيى مەن كوشباسشىلىق الەۋەتىن انىقتاۋ ماقساتىندا بيىل ەكى مۋلتيپسيحومەتر ساتىپ العان.
