قىرعىزستاندا حالىق قۇرىلتايى باستالدى

بىشكەكتە قىرعىز رەسپۋبليكاسىنىڭ پرەزيدەنتى سادىر جاپاروۆتىڭ قاتىسۋىمەن ەكى كۇندىك حالىق قۇرىلتايى باستالدى، دەپ حابارلايدى Kazinform.

وعان 700 دەلەگات قاتىسىپ جاتىر، ولاردىڭ قاتارىندا رەسپۋبليكانىڭ بارلىق وبلىستارىنان - 640 ادام، ءتۇرلى ەتنوستىق توپتاردان – 30، شەتەلدىك ەڭبەك ميگرانتتارىنان - 30 دەلەگات، سونداي-اق، جوگوركۋ كەنەش دەپۋتاتتارى، مينيسترلەر كابينەتىنىڭ مۇشەلەرى، مەملەكەتتىك ورگاندار مەن جەرگىلىكتى ءوزىن-ءوزى باسقارۋ ورگاندارىنىڭ وكىلدەرى قاتىسۋدا.

قىرعىز رەسپۋبليكاسىنىڭ پرەزيدەنتى سادىر جاپاروۆ ەكىنشى حالىق قۇرىلتايىنا قاتىسۋشىلار الدىندا ءسوز سويلەپ، قۇرىلتايدىڭ اشىقتىق پەن جاۋاپكەرشىلىك قامتاماسىز ەتۋدە جانە ءاربىر ازاماتتىڭ مەملەكەت دامۋىنا اتسالىسۋىنا مۇمكىندىك بەرەتىن مىقتى قۇرال رەتىندەگى ماڭىزدىلىعىن اتاپ ءوتتى.

- حالىقتىق قۇرىلتاي - مەملەكەتتىك باسقارۋدىڭ اشىقتىعى مەن ەسەپتىلىگىن قامتاماسىز ەتەتىن قۋاتتى قۇرال. حالىقتىق قۇرىلتاي كوزقاراستار مەن پىكىرلەردىڭ الۋاندىعىنا بايلانىستى مەملەكەتتىك ماڭىزى بار وزەكتى ماسەلەلەردى تالقىلاۋعا جانە رەفورمالاردى ىلگەرىلەتۋ بويىنشا بىرلەسكەن ۇسىنىستار ازىرلەۋگە مۇمكىندىك بەرەدى. حالىق قۇرىلتايىنىڭ ديالوگ قۇرالى رەتىندەگى تيىمدىلىگى بيلىكتىڭ كوتەرىلگەن ماسەلەلەر مەن وندا ايتىلعان پىكىرلەرگە قانشالىقتى نازار اۋداراتىنىمەن بايلانىستى.

بۇگىنگى جالپىۇلتتىق جيىنعا بارلىق اكىمشىلىك اۋداندار مەن قالالاردىڭ، كونفەسسيالىق ۇيىمدار مەن ەڭبەك ميگرانتتارى، حالىق اراسىنان كونكۋرستىق نەگىزدە ىرىكتەلىپ الىنعان، قوعام ومىرىندەگى ماسەلەلەرمەن تانىس، ولاردى شەشۋ جولىندا وزىندىك كوزقاراسى بار تۇلعالار قاتىسىپ جاتىر دەپ ويلايمىن.

وسى ءساتتى پايدالانا وتىرىپ، حالىق قۇرىلتايىنا ەلدىڭ دامۋىنا ۇلەس قوسىپ، وي-پىكىرىمەن ءبولىسۋ نيەتىمەن سىرتتان كەلگەن قانداستارىما قۇرمەت پەن العىس ايتقىم كەلەدى. قۇرىلتايدىڭ ءرولى مەن ورنىنا سالماقتى ءمان بەرۋ - دەموكراتيامىزدىڭ تالابى. بۇل ءاربىر ازاماتتىڭ مەملەكەتتىڭ قالىپتاسۋى مەن دامۋىنا قاتىسۋىنا مۇمكىندىك بەرەتىن مەحانيزم. بۇل مەحانيزم جىلدار وتكەن سايىن جەتىلدىرىلەدى دەپ سەنەمىن. ۇرپاقتان ۇرپاققا جالعاسىپ كەلە جاتقان، حالقىمىزدىڭ ءۇنى ەستىلەتىن ماڭىزدى ينستيتۋتتى پايدالانا باستاعانىمىزدى ماقتان تۇتامىن»، - دەدى قىرعىز رەسپۋبليكاسىنىڭ پرەزيدەنتى س. جاپاروۆ.

قىرعىزستان باسشىسى وتكەن جىلى قابىلدانعان حالىقتىق قۇرىلتاي قارارى بويىنشا اتقارىلعان جۇمىستاردىڭ قورىتىندىسىن باياندادى. 3182 تارماقتان تۇراتىن ءىس-شارالار جوسپارىنىڭ 68 ءى سوت-قۇقىقتىق، 1548 ءى الەۋمەتتىك-ەكونوميكالىق، 313 ءى جەر، 1253 ءى ءتۇرلى ەكونوميكالىق ماسەلەلەرگە قاتىستى بولدى. ونىڭ 358 ءى ورىندالعانىن، 2200 ءى ورىندالۋ ساتىسىندا، 523 ءى بەلگىلەنگەن مەرزىمدە ورىندالماعانى اتاپ ءوتىلدى.

وش وبلىسى، قارا-سۋ اۋدانى، قىزىل-قىشتاق اۋداندىق ايماعىنان كەلگەن دەلەگات ءدىلمۇراد راحمانوۆ تىلشىگە بەرگەن سۇحباتىندا وزەكتى ماسەلەلەردى كوتەرىپ وتىرعان بۇل جيىنعا ەكىنشى جىل قاتارىنان قاتىسىپ وتىرعانىن ايتتى. ونىڭ ويىنشا، بۇل شارا حالىق پەن مەملەكەت باسشىسى اراسىنداعى بايلانىستى جاقىنداتاتىن قۇرال. ول ءوز وكرۋگىنىڭ تۇرعىندارى اتىنان جىلدار بويى شەشىمىن تاپپاي كەلە جاتقان ماسەلەلەردى كوتەرۋدى جوسپارلاپ وتىر.

- قۇرىلتايدا بۇرىنعى تيۋليۋكەن اۋرۋحاناسىنىڭ بازاسىندا تەراپيا ءبولىمى مەن بالالار بولىمشەسىن سالۋعا قاتىستى تۇيتكىلدى ماسەلەلەردى ايتۋدى جوسپارلاپ وتىرمىن. اۋدانىمىزداعى حالىق سانى 50 مىڭ ادامدى قۇرايدى، سايكەسىنشە ناۋقاستار سانى دا كوپ. ەكىنشى ماسەلە، دەموگرافيالىق ءوسىمدى ەسكەرە وتىرىپ، الداعى ۋاقىتتا اۋداندا قوسىمشا مەكتەپتەر سالۋ. قۇرىلىس كومپانيالارىن كوپقاباتتى ۇيلەردەن بولەك كوممۋنالدىق جانە الەۋمەتتىك ينفراقۇرىلىمدار سالۋدى مىندەتتەپ، ماسەلەنى جەرگىلىكتى بيلىككە قالدىرماۋ كەرەك. جىل ساناپ وقۋ ورىندارىنداعى ورىن تاپشىلىعى كۇشەيىپ كەلە جاتقان سۋرا-تاش، كوممۋنيست، انديجان، يشكاۆان اۋىلدارىندا مەكتەپ سالۋ قاجەت. ءۇشىنشى ماسەلە ەلدەگى اكىمشىلىك- اۋماقتىق رەفورماعا قاتىستى، قىزىل-قىشتاق اۋىلدىق كەڭەسىنىڭ حالقى وش قالاسىنىڭ قۇرامىنا كىرۋدەن باس تارتتى. وسىعان بايلانىستى ولار پرەزيدەنتتەن حالىقتىڭ پىكىرىنە ءمان بەرىپ، تۇرعىندار ءۇشىن شەشىم قابىلداماۋىن سۇرايدى. وش قالاسىنا قوسىلعان جاعدايدا وبلىس حالقى جەر ۋچاسكەلەرىنەن ايىرىلىپ قالۋدان، سونداي-اق ءوز ايماعىنىڭ ينفراقۇرىلىمىن دامىتۋعا باعىتتالعان بيۋجەتتىك قاراجاتتى جەتكىلىكسىز الۋدان قورقادى. حالىقتىڭ قورقىنىشىن دۇرىس ءتۇسىنىپ، ساياسي قىسىمسىز بىرلەسىپ شەشۋ كەرەك»، - دەپ تۇيىندەدى ءسوزىن دەلەگات.

سونداي-اق د. راحمانوۆ بۇل كەزدەسۋدىڭ ناتيجەسى مەملەكەتتىك ورگانداردىڭ ارەكەتىنە بايلانىستى بولاتىنىن ايتتى.

ەستەرىڭىزگە سالا كەتەيىك، قىرعىزستانداعى حالىق قۇرىلتايى 15-16- جەلتوقسان كۇندەرى وتەدى، ەكىنشى كۇننىڭ قورىتىندىسى بويىنشا قارار قابىلداۋ جوسپارلانۋدا.