قىرعىزستاندا بۇگىن نوسەر جاۋىن، كەي ايماقتاردا سەل ءجۇرۋ قاۋپى جوعارى

بىشكەك. KAZINFORM - سينوپتيكتەردىڭ بولجامىنشا، تالاس، وش، جالال-اباد، باتكەن، نارىن وبلىستارىنىڭ باسىم بولىگىندە، شۋ، ىستىقكول وبلىستارىنىڭ كەي جەرلەرىندە جاڭبىر جاۋىپ، نايزاعاي ويناپ، تاۋلى ايماقتاردا قار جاۋادى، دەپ حابارلايدى كابار اگەنتتىگى.

تاۋ بوكتەرىندە جانە جولداردىڭ تاۋلى بولىكتەرىندە قار جاۋىپ، كوكتايعاق بولادى. باتىستان سوعاتىن جەل جىلدامدىعى 4-9 م/س جەتەدى.

بىشكەكتە بۇگىن كوشپەلى بۇلت شىعادى، جاۋىن-شاشىنسىز، كۇندىز اۋا تەمپەراتۋراسى 23+، تۇندە 11+ گرادۋسقا دەيىن كوتەرىلەدى.

سونداي-اق، 22-23-ساۋىرگە بولجانعان قۇبىلمالى اۋا رايى مەن نوسەر جاۋىنعا بايلانىستى وش، جالال-اباد، باتكەن وبلىستارىندا سەل ءجۇرۋ قاۋپى جوعارى.

توتەنشە جاعدايلار مينيسترلىگى زارداپتاردىڭ الدىن الۋ ءۇشىن ارىقتار مەن درەناجدىق ارنالاردى تازالاۋعا كەڭەس بەرەدى.

ال وش وبلىسىندا توتەنشە جاعداي رەجيمى ەنگىزىلدى.

وبلىستىڭ ەلدى مەكەندەرىندەگى سەلگە بايلانىستى شۇعىل شارالار قابىلداندى. كەشە مىرزاكە-قارا- قۇلجا- الايقۋۋ تاس جولىنىڭ 41-شى شاقىرىمىندا سەل ءجۇرىپ، ءبىر ادام قازا تاپتى. لاي اعىنى ءبىر وتباسىنىڭ ءتورت ادامى كەلە جاتقان كولىكتى باسىپ قالدى. جەرگىلىكتى تۇرعىندار ەكى ايەل مەن ءبىر بالانى امان الىپ قالدى. ەر ادامدى سەل الىپ كەتكەن. قۇتقارۋشىلار ونىڭ دەنەسىن تاۋىپ، تۋىستارىنا تاپسىردى.

كۇنى كەشە ساعات 21.00-دە ايماق باسشىسى ەلشىبەك جانتايەۆ شتاب وتىرىسىن وتكىزىپ، وندا توتەنشە جاعداي ەنگىزۋ تۋرالى شەشىم قابىلداندى.