قىرعىزستاندا بيلىكتى باسىپ الۋ ءۇشىن شتاب قۇرماقشى بولعان يماميدين تاشوۆ ۇستالدى

استانا. KAZINFORM - بيلىكتى كۇشپەن باسىپ الماق بولدى دەگەن كۇدىكپەن ىزدەۋدە جۇرگەن يماميدين تاشوۆ شۋ وبلىسى قايىڭدى اۋىلىندا ۇستالدى. بۇل تۋرالى ۇلتتىق قاۋىپسىزدىك كوميتەتىنىڭ باسپا ءسوز ورتالىعى حابارلادى، دەپ جازادى 24 kg.

ۇ ق ك حابارلاۋىنشا، يماميدين تاشوۆ قىرعىز- قازاق شەكاراسىن زاڭسىز كەسىپ وتكەن. ول الماتىدان قارا-بالتاعا كەلە جاتقان جەرىندە ۇستالدى.

«قارا- بالتادا ول بيلىكتى باسىپ الۋ ماقساتىنداعى نارازىلىق اكسياسىن وتكىزۋگە كۇش بىرىكتىرەتىن ۋاقىتشا شتاب ۇيىمداستىرۋدى جوسپارلاعان. يماميدين تاشوۆ ىزدەۋدە جۇرگەندە الەۋمەتتىك جەلىلەر ارقىلى جۇمىسقا قابىلداۋ جۇمىستارىن جۇرگىزگەن. قازىرگى ۋاقىتتا تەرگەۋ امالدارى جۇرگىزىلىپ جاتىر»، - دەلىنگەن حابارلامادا.

«KG Group» قۇرىلىس كومپانياسىنىڭ باسشىسى يماميدين تاشوۆقا قاتىستى قىلمىستىق ءىس قوزعالدى. ول بيلىكتى كۇشپەن باسىپ الماق بولدى دەگەن كۇدىككە ءىلىندى. بۇعان دەيىن وعان ىزدەۋ جاريالانعان بولاتىن. بۇل ىسكە بەلسەندىلىك تانىتقان تىلەكمات كۇرەنوۆ تە ايىپتالىپ وتىر.

بۇعان دەيىن ۇلتتىق قاۋىپسىزدىك كوميتەتى KG Group كومپانياسى بىشكەكتە التى كوپپاتەرلى تۇرعىن ءۇي سالعانىن حابارلاعان. ءبىراق بۇل نىسانداردىڭ ەشقايسىسى رۇقساتسىز سالىنعان قۇرىلىس نىساندارى بولعاندىقتان پايدالانۋعا بەرىلگەن جوق.

بۇعان دەيىن الەۋمەتتىك جەلىلەردە يماميدين تاشوۆتىڭ «بانديت سياقتى ۇرلانعانىن»، تۇتقىندا بولعانىن ايتىپ، مەملەكەت كىرىسىنە اۋدارىلعان 52 ميلليون سومنان بولەك، تاعى 100 ميلليون سوم تالاپ ەتكەنىن ايتقان ۆيدەوسى جاريالانعان بولاتىن.

اۆتور
ەركەجان سماعۇلوۆا