قىرعىزستاندا بالالاردى جۇك كولىگى قاعۋ وقيعاسىنا بايلانىستى 21 شەنەۋنىك جازالاندى
استانا. KAZINFORM - قىرعىزستاننىڭ جالال-اباد وبلىسىنىڭ سوزاق اۋدانىندا بولعان وقيعا سالدارىنان 30 دان استام مەكتەپ وقۋشىسى زارداپ شەككەن وقيعانىڭ ءمان-جايىن انىقتاۋ بويىنشا ۆەدومستۆوارالىق كوميسسيانىڭ جۇمىسى اياقتالدى.
- 2-مامىردا سوزاق اۋدانى جەرگە-تال اۋىلىندا وتكەن «ۇرانىم ماناس» مادەني شاراسى كەزىندە بولعان وقيعانىڭ ءمان-جايى انىقتالدى. قىرعىز رەسپۋبليكاسىنىڭ پرەزيدەنتى سادىر جاپاروۆتىڭ تاپسىرماسىمەن قۇرىلعان ۆەدومستۆوارالىق كوميسسيانىڭ قورىتىندىسىندا اتالعان شارانى ۇيىمداستىرۋشىلار قاتىسۋشىلاردىڭ قاۋىپسىزدىگىن قامتاماسىز ەتۋ ءۇشىن قاجەتتى شارالاردى قولدانباعانى اتالىپ ءوتتى. اسىرەسە، وبلىستىق، اۋداندىق ىشكى ىستەر ورگاندارىنىڭ باسشىلارى وزدەرىنە جۇكتەلگەن مىندەتتەردى ءتيىستى دەڭگەيدە ورىنداماعان. سونىمەن قاتار، ءبىلىم بەرۋ مەكەمەلەرىنىڭ جاۋاپتى تۇلعالارىنىڭ اۋداندىق جانە وبلىستىق باسقارمالارمەن دۇرىس ارەكەت ەتپەگەنى انىقتالدى»، - دەلىنگەن ۆەدومستۆو حابارلاماسىندا.
قىرعىزستان پرەزيدەنتى باسپا ءسوز قىزمەتىنىڭ مالىمەتىنشە، تەرگەۋ بارىسىندا جەرگىلىكتى ءوزىن-ءوزى باسقارۋ ورگاندارىنىڭ باسشىلارىنا «ۇرانىم ماناس» كونكۋرسىن وتكىزۋدىڭ ناقتى كۇنى تۋرالى حابارلانباعانى تۋرالى جەكەلەگەن فاكتىلەر انىقتالدى. ءىس-شارانى ۇيىمداستىرۋ ماسەلەلەرى 1-مامىردان 5-مامىرعا دەيىنگى كۇندەر جۇمىسسىز دەپ جاريالانۋىنا بايلانىستى قيىنداي تۇسكەن.
- ۆەدومستۆوارالىق كوميسسيا وقيعانىڭ ءمان-جايىن تەكسەرۋ ناتيجەسى بويىنشا تارتىپتىك جازالار جاريالاۋدى، سونداي-اق ءتيىستى مينيسترلىكتەر مەن جەرگىلىكتى ءوزىن-ءوزى باسقارۋ ورگاندارىنىڭ باسشىلارى مەن قىزمەتكەرلەرىن اتقاراتىن قىزمەتىنەن بوساتۋدى ۇسىندى. بارلىعى 21 ادام تارتىپتىك جاۋاپكەرشىلىككە تارتىلدى، ونىڭ ىشىندە 6 لاۋازىمدى تۇلعا قىزمەتىنەن بوساتۋعا ۇسىنىلدى، - دەلىنگەن حابارلامادا.
باسپا ءسوز قىزمەتىنىڭ مالىمەتىنشە، شاراعا اۋدان بويىنشا 18 مەكتەپتەن بارلىعى 2878 وقۋشى مەن 341 مۇعالىم قاتىستى. بۇل رەتتە جول قاۋىپسىزدىگىن قامتاماسىز ەتۋ ءۇشىن جول پوليتسياسى بولىمىنەن ەكى-اق ينسپەكتور جۇمىلدىرىلعان.
وسىعان دەيىن قىرعىزستاندا بالمۇزداق تيەگەن جۇك كولىگى 29 بالانى قاعىپ كەتكەنىن جازعان ەدىك.
كەيىنىرەك قىرعىزستاندا 29 بالانى قاققان كولىك جۇرگىزۋشى ۇستالعانىن حابارلادىق.
سونداي-اق وسى وقيعا بويىنشا 12 پوليتسيا قىزمەتكەرى جازالانعانى حابارلاندى.
