قىرعىزستاندا 2024-جىلدىڭ 1- شىلدەسىنەن باستاپ ساۋدا پاتەنتتەرى جويىلادى
استانا. KAZINFORM - قىرعىزستاندا 2024-جىلدىڭ 1- شىلدەسىنەن باستاپ پاتەنت بويىنشا ساۋدا قىزمەتى توقتاتىلادى.
قىرعىز رەسپۋبليكاسىنىڭ مەملەكەتتىك سالىق قىزمەتىنىڭ مالىمەتىنشە، ەلدە پاتەنت بويىنشا ساۋدا 2024-جىلدىڭ 1- شىلدەسىنە دەيىن جارامدى. وسىدان كەيىن پاتەنت بويىنشا جۇمىس ىستەيتىن كاسىپكەرلەر ەڭ قولايلى سالىق رەجيمىنە كوشۋ ۇسىنىلادى.
اتاپ ايتقاندا، سالىقتاردى تولەۋ قولدانىستاعى سالىق زاڭناماسىنا جانە جالپى نەگىزدەگى ستاۆكالارعا سايكەس جۇزەگە اسىرىلاتىن جالپى سالىق رەجيمى، سونداي-اق ءبىرىڭعاي سالىق نەگىزىندە جەڭىلدەتىلگەن سالىق جۇيەسى. سونىمەن قاتار، سالىق ستاۆكالارى 15 ميلليون سومعا دەيىنگى جىلدىق اينالىم ءۇشىن 0 پايىز، 30 ميلليون سومعا دەيىن 0,5 پايىز، 50 ميلليون سومعا دەيىن 1 پايىزدى قۇرايدى.
بازارلار مەن شاعىن بازارلار ءۇشىن جىلدىق كىرىس 100 ميلليون سومنان اسپايتىن بولسا، ءبىرىڭعاي سالىق مولشەرلەمەسى 0,1 پايىزدى قۇرايدى. ستراتەگيالىق ساناتقا جاتقىزىلعان نارىقتاردا جۇمىس ىستەيتىندەردى قوسپاعاندا، ءبىرىڭعاي سالىق نەگىزىندە جۇمىس ىستەيتىن ساۋداگەرلەر باقىلاۋ-كاسسالىق ماشينالاردى پايدالانۋعا جانە ساقتاندىرۋ جارنالارىن تولەۋگە مىندەتتەلەدى.
ەلدەگى جانە ورتالىق ازياداعى ەڭ ءىرى بازارلار «دوردوي» جانە «تۇراتالى ەل بازارلار» («قارا-سۋۋ») ستراتەگيالىق نىسان بولعاندىقتان، ونداعى كاسىپكەرلەر ارنايى سالىق رەجيمىنە كوشەدى. بۇل سالىق تابىس سالىعىن، ساتۋدان الىناتىن سالىقتى، ق ق س- تى اۋىستىرادى جانە اكسيزدەلەتىن تاۋارلاردى، ارنايى ليسەنزيالاردى نەمەسە رۇقساتتاردى تالاپ ەتەتىن تاۋارلاردى قوسپاعاندا، جالپى تاۋارلاردى وتكىزۋگە قولدانىلادى.
اتالعان بازارلاردىڭ ساتۋشىلارى ەرەكشە رەجيمدەگى ساۋدا ايماقتارىندا قىزمەتىن جۇزەگە اسىراتىن سۋبەكتىلەر اراسىندا باقىلاۋ- كاسسالىق ماشينالاردى، ەلەكتروندىق شوت-فاكتۋرالاردى جانە ەلەكتروندىق جۇكقۇجاتتاردى پايدالانۋدان بوساتىلادى. سونىمەن قاتار، تاۋاردى قىرعىزستاننىڭ قالعان اۋماعىنا وتكىزگەن جاعدايدا شوت-فاكتۋرا سالىق زاڭناماسىنا سايكەس جازىلۋى ءتيىس.
ەستەرىڭىزگە سالا كەتەيىك، 2023-جىلدىڭ قاراشا ايىنان باستاپ قىرعىزستاندا جاڭا سالىق رەجيمىنە، ياعني پاتەنتتەردى تولىعىمەن الىپ تاستاۋعا قارسى شىققان بازار ساۋداگەرلەرىنىڭ ميتينگىلەرى ءوتتى.
قىرعىزستاننىڭ «دوردوي» ءىرى بازارىنداعى ساۋدا نۇكتەلەرى ساتۋشىلارىنىڭ نارازىلىق شەرۋىندە قىرعىزستان پرەزيدەنتى سادىر جاپاروۆ ساۋدا-ساتتىقپەن اينالىساتىن كاسىپكەرلەرگە پاتەنت جۇيەسىن الىپ تاستاۋدى 2024-جىلدىڭ 1-شىلدەسىنە دەيىن شەگەرۋگە شەشىم قابىلداعان ەدى.
