پرەزيدەنت نيكاب پەن پارانجا كيۋگە قاتىستى پىكىر ءبىلدىردى
استانا. KAZINFORM - قىرعىزستان پرەزيدەنتى سادىر جاپاروۆ «كابار» اگەنتتىگىنە بەرگەن سۇحباتىندا بەتتى تولىق جاباتىن كيىمدى كيۋگە تىيىم سالۋ ماسەلەسى جونىندە پىكىر ءبىلدىردى.
مەملەكەت باسشىسىنىڭ ايتۋىنشا، جاقىندا ەلدە ءدىن سالاسىن رەتتەيتىن زاڭ قابىلدانعان. سوعان سايكەس، دىنگە سەنۋشىلەردىڭ قۇقىقتارىنا قاتىستى بارلىق ماسەلە مۋفتيات پەن عۇلامالار كەڭەسىنە تاپسىرىلعان. بيلىك ءدىني ماسەلەلەرگە ارالاسا المايدى. مۋفتيات قۇران مەن حاديستەرگە سۇيەنە وتىرىپ، ءدىني بىلىمگە نەگىزدەلگەن ءپاتۋالار شىعارادى، ال بۇل ءپاتۋالاردى ەل اۋماعىندا مىندەتتى تۇردە ورىنداۋ قاجەت.
سادىر جاپاروۆ ايەلدەردىڭ حيدجاب، نيكاب جانە پارانجا كيۋ ماسەلەسىنە قاتىستى ءوز پىكىرىن ءبىلدىردى:
- «حيدجاب» ءسوزى قىرعىز تىلىندە جاي عانا «جاۋلىق» دەگەندى بىلدىرەدى. جاۋلىق - ەجەلدەن كەلە جاتقان انالارىمىزدىڭ، اپكە-قارىنداستارىمىزدىڭ ءداستۇرلى باس كيىمى. ايەل ونى قالاي تاقسا دا - بۇل ونىڭ جەكە ءىسى. وراپ تاعا ما، يەگى استىنان بايلاي ما - باستىسى، بەتى اشىق بولۋى كەرەك. نيكاب - كوزدەن باسقا جەردىڭ ءبارىن جاباتىن باس كيىم. ال پارانجا - بەتتى تولىقتاي جابادى. ولاردى كيۋگە مۋفتيات شەشىمىمەن تىيىم سالىنعان. ازاماتتارىمىز مۋفتياتتىڭ ءپاتۋاسىن ورىنداۋعا مىندەتتى. ءبىزدىڭ داستۇرىمىزدە ايەلدەر ەشقاشان پارانجا كيمەگەن، سوندىقتان بۇل ماسەلەنى داۋعا اينالدىرۋدىڭ قاجەتى جوق، - دەدى پرەزيدەنت.
سادىر جاپاروۆتىڭ پىكىرىنشە، قۇقىق قورعاۋ ورگاندارى بەتى اشىق ايەلدەردى (ياعني جاي جاۋلىق تاققانداردى) توقتاتپاۋى كەرەك.
- بەتتى تولىقتاي جاۋىپ تۇراتىن نيكاب پەن پارانجاعا كەلسەك، ءبىز بۇل ماسەلەدە قوعامدىق قاۋىپسىزدىكتى قامتاماسىز ەتۋگە باسا ءمان بەرۋىمىز كەرەك. بۇل - بيلىكتىڭ باستاماسى ەمەس، قىرعىزستان مۇسىلماندارى ءۇشىن مۋفتيات بەكىتكەن ەرەجە. مەملەكەت بۇل ماسەلەگە بەيجاي قاراماۋى كەرەك، كەرىسىنشە، وسى ەرەجەلەردىڭ ورىندالۋىنا كومەكتەسۋى ءتيىس. جالپى، بارلىق ماسەلەدە مۋفتياتتىڭ ءپاتۋالارىن ورىنداۋعا قولداۋ كورسەتۋىمىز كەرەك، - دەدى قىرعىز كوشباسشىسى.
ەسكە سالايىق، قىرعىزستاندا بيىل قاڭتار ايىندا قابىلدانعان زاڭنامالىق وزگەرىستەرگە سايكەس، مەملەكەتتىك مەكەمەلەردە جانە قوعامدىق ورىنداردا ادامنىڭ ءجۇزىن تانۋعا مۇمكىندىك بەرمەيتىن كيىمدى كيگەن ازاماتتارعا 20 مىڭ سوم (117600 تەڭگە) كولەمىندە ايىپپۇل سالىنادى.
