قىرعىزستان پرەزيدەنتى مۇحتار شاحانوۆتىڭ قازاسىنا كوڭىل ايتتى

استانا. قازاقپارات - قىرعىز رەسپۋبليكاسىنىڭ پرەزيدەنتى سادىر جاپاروۆ قازاقستان پرەزيدەنتى قاسىم-جومارت توقايەۆقا كورنەكتى اقىن، قوعام قايراتكەرى مۇحتار شاحانوۆتىڭ دۇنيەدەن وتۋىنە بايلانىستى كوڭىل ايتۋ جەدەلحاتىن جولدادى.

مەملەكەت باسشىسى ءوز جەدەلحاتىندا مۇحتار شاحانوۆتىڭ ەكى ەل اراسىنداعى دوستىقتى نىعايتۋعا قوسقان زور ۇلەسىن اتاپ ءوتتى. اقىن قازاقستاننىڭ قىرعىزستانداعى تۇڭعىش توتەنشە جانە وكىلەتتى ەلشىسى قىزمەتىن اتقارىپ، قىرعىز ادەبيەتىنىڭ الىبى شىڭعىس ايتماتوۆپەن جاقىن دوس بولعان ەدى.

«مۇحتار اعا باۋىرلاس قازاق حالقىنىڭ عانا ەمەس، قالىڭ قىرعىز ەلىنىڭ دە اقساقالى، سۇيەنەر تىرەگى ەدى. مۇنداي الىپ تۇلعالاردىڭ باقيلىق بولۋى جايلى حالقىمىزدا «بىلگەنگە تۇتاس ءبىر ءداۋىر كەتتى» دەيدى. شىنىندا دا، مۇحتار اعانىڭ ماڭگىلىك ساپارعا اتتانۋىمەن كۇللى تۇركى الەمى ءبىر داۋىرىنەن ايىرىلدى»، - دەپ جازدى سادىر جاپاروۆ.

قىرعىز باسشىسى اقىننىڭ قايسار مىنەزى مەن شىنشىلدىعىنا توقتالىپ، ونىڭ «جەلتوقسان وقيعاسى» كەزىندەگى باتىل قادامدارىن ەرەكشە ەسكە الدى. جەدەلحاتتا شاحانوۆتىڭ قازاق پەن قىرعىز حالىقتارىنا «تۇيەنىڭ قوس وركەشىندەي» بىردەي جاناشىر بولعانى ايتىلعان.
«وسىنداي دارىندى، ەلجاندى ۇلىنان ايىرىلىپ، قايعى جامىلعان قازاق جۇرتىنا، اقىننىڭ تۋعان-تۋىستارىنا شىن كوڭىلىممەن قايعىرىپ، كوڭىل ايتامىن. قايرات تانىتىپ، سابىر ساقتاڭىزدار!» - دەلىنگەن رەسمي مالىمدەمەدە.